Padma Shri dawn lawmpui

Thutak Nunpuitu Team dintu Dr Sangthankima’n Padma Shri a dawn chu Thawhtanni khan Kalvari Home TNT Khuangpuilam Kolasibah lawm a ni.
Lawmna hmanpuitu Kolasib bialtu MLA, Assembly deputy speaker Lalfamkima chuan, Pathian atanga chhuak hmangaihna dik, mahni mihringpuite hmangaihna nen Pu Sangthankima’n hma a la a, Pathianin mal a sawm a ni tih hmuh theihin a lang tih a sawi. Mizoramah eng vangin nge hmeichhiate aiin mipate nun a tawi bik tak tih chu ngaihtuah tham a tling ta tih a sawi bawk.
Padma Shri Sangthankima chuan tunah hian TNT Muanna Veng Aizawlah mi 1810 awmin, khawvela home lian ber an ni tih a sawi a. Padma Shri dawn chu phu lo a inti in, a dil ngai lo a, Pathian malsawmna avang erawhin award 20 chuang a dawng tawh a, chu’ng zingah chuan Mother Teressa International Award bakah international award pahnih leh national award pali a tel tih a sawi. Mi tam takin Padma Shri award an dawn chhan ngaihtuah chuan, a ni chu vohbik enkawl, ruihhlo ngai enkawl a nihna chu a danglamna a ni a, hetiang chawimawina a dawn chhan hi an ni vang hi a ni tih a sawi a ni.
TNT hian Mizoramah Champhai, Lunglei, Aizawl leh Kolasib ah Home a nei a. Kolasib TNT hi kum 1992 a din a ni. Tahan Myanmar ah centre an nei bawk.