Democrats zingah Biden duh lo pung

Democratic lawmaker panga chuan President Joe Biden chu US presidential election November 5 a neih turah candidate ni lo turin an duh.
Heng lawmaker – Jerry Nadler, Mark Takano, Joe Morelle, Ted Lieu leh Adam Smith te chuan June 27 a Atlanta a Republican rival Donald Trump nena Biden-an debate chhe tak a neih chungchanga Democratic Party phone call neihnaah an ngaihdan an sawi a ni.
Biden ngei pawhin Trump nena an debate zan chu ‘zan chhia’ tiin a sawi a, a approval rating pawh tlahniam nghalin party member te pawhin kum li dang rorelna lekkawh leh turin a laktlak ang em tihah zawhna an nei zui nghal a ni. Chutih laiin Biden chuan presidential election-ah a chuh tur thu sawiin Trump a hneh ngei a rin thu a sawi zui thung.
House Minority Leader Hakeem Jeffries chuan June 27 debate kaihhnawihah House of Representatives-a a thawhpuite chu virtual meeting a neihpui a.
He virtual meeting hi ‘listening session’ tia sawi niin Biden candidacy chungchangah member ten an ngaihdan an sawi niin The New York Times chuan a tarlang a. Democrats hotu lawk te chuan Biden chu inthiarfihlim turin an duh tia sawi a ni.
Congressman Smith, Armed Services Committee member chuan Biden chu a inhnuhdawh a ngai tiin a sawi tia sawi niin Congresmen dang pali te pawhin Biden chu inthiarfihlim turin an duh tia sawi a ni bawk.
“Ted Lieu chu House Democratic leadewrship a nihna nei sang ber Biden chu inthiarfihlim tura duhtu a ni,” tiin The Washington Post chuan a tarlang bawk.