Myanmar-ah sipai sorkar tawlh zel

Myanmar-a ethnic minority group chak ber military government nena indo mekte chuan airport pawimawh Myanmar-a world-class beach resort pan nana pawimawh ber chu an thunuaia an dah tak thu an sawi.
He airort hi western state Rakhine-a awm niin Thandwe airport tih niin ma Zin Airport tia sawi a ni bawk a, Myanmar-a khawpui lian ber Yangon atanga hmarthlang lama 260 kilometers a hlaa awm a ni.
Kum 2021-a Aung San Suu Kyi sorkar paihthlaa sipai thuneihna kalpuitu military government te tan hnungtawlhna nasa tak a ni a. Myanmar hmun hrang hrangah pro-democracy militant te kaihhruaiin sipaite dona nasa tak a thleng mek a.
Myanmar sipaite chuan anmahni dodaltute nuaichimih nan nunrawnna nasa tak an kalpui avangin khawvelin a ngaihven hle reng tawh a. Sipai sorkar sawiseltute chuan international community te chu Myanmar sipai sorkar laka hrekna nasa zawk kalpui turin an ngen reng bawk.
Arakan Army te chuan Telegram messaging app kaltlang thuchhuah an siamah indona avangin nunna chan Myanmar sipai 400 chuang ruang an hlawm tawh tiin an sawi a, hei bakah hian ralthuam thahnem tak an mansak an ti bawk.
Rakhine-ah airport paruk awmin tuna airport an lak hmang hian rebel te chuan Rakhine coastal region mai bakah hmar lam ram zau zawk an thunun phah thei dawna ngaih a ni.
Arakan Army-te hi Rakhine state-a Buddhist Rakhine ethnic group te military wing niin Myanmar central government atangin autonomy ngiat mek an ni bawk.
Nikum November thla atang khan Arakan Army te hian Myanmar sipaite chu bei tawhin khawpui pawimawh 17 zinga pakua an la tawh a ni.
Zin airport atang hian Myanmar-a Bay of Bengal-a mel 4 laia sei beach Ngapali tih chu pawh theih a ni a. He beach hian international tourism ngaihven a hlawh hle a, mahse, Covid-19 avangin development kalpui te tihkhawtlai a ni thung a.
April thla atang khan airport chhehvelah inkahna nasa tak a thlen tan avangin beach resort hnaiha hotel 46 leh guest house te chu kharin a awm phah tawh a ni.
Western ram hrang hrangte US pawh telin Myanmar military leader leh businesses te an cronies te lakah economic leh diplomatic sanction an kalpui tawh a.
Myanmar sipai sorkar sawiseltute chuan khawthlang ram chu tun aia nasaa sipai sorkar chu hrek turin an ngen a. A bik takin Myanmar in a mite beih nana indo thlawhna a hman nasat avangin jet fuel lamah hrek turin an ngen a ni.
Human Rights Group Amnesty International te chuan Myanmar sipai ten fuel an mamawh ang tawk an neih theih loh nana khawvelin a hrek chungin Myanmar chuan aviation fuel chawkluhna a la hre zel tiin a sawi bawk.
Myanmar-in hun pangngaia a fuel chawkluh aia a let hnih thuma tam zawk kumin January thla atanga June thla inkar chungin a chawlut tiin an sawi a. Tun hnaia a chawkluhna hnaivai ber chu Chinese-owned oil tanker hmangin niin Singapore-a inbun oil trading company te pawh inhnamhnawihin Vietnam kaltlangin an chawlut tiin Amnesty te chuan an sawi.
China leh Russia chuan Myanmar military sorkar thian tha leh thawhpui an nih avangin Myanmar laka hrekna kalpui chu a nih tur angin a ni lo tih a ni bawk.