Two wheeler taxi chhiarkawp

State Transport Authority-in Aizawl khawpui chhunga service tur two wheeler taxi permit a pekchhuah zat chu 3,646 a ni a. Aizawl khawpui population (hei hi 2021 chhiarpui record a awm loh avangin, population growth atanga chhutin Aizawl population hi 4,03,000 vel anga ngaih a ni) atanga chhutin two wheeler taxi pakhatin chawhrualin mihring 110.5 zel vil ang a ni a; hei hi two wheeler nei leh nei lo huam veka chhut a ni.
Two wheeler taxi hmang lo tur, mahnia two wheeler hmang thinte huam lovin han chhut leh ta ila. Tun dinhmunah Aizawl district chhunga two wheeler hrim hrim register zat hi 1,59,625 a ni a, hei hi Aizawl population atanga paihin, two wheeler nei lo zat a lo chhuak a, chu chu 2,43,375 a ni. Hei hi two wheeler taxi awm zat 3,646 hian sem ila, two wheeler taxi pakhat zelin mihring a vil zat tur chu 66.75 a lo ni ta a. Hei pawh hian private car, taxi car leh city bus hmang thin a la huam vek a. Private car, taxi car leh city bus hmang thin hi huam lo turin han paih leh ta ila, two wheeler taxi pakhatin mihring a vil zat tur hi 60 emaw, a aia tlem emaw a ni dawn tih a lo lang a ni.
Hei hi population atanga chhut a nih avangin lirthei hmang lo tur, mahni chenna in chhuahsan ngai lote pawh huam vekin a ni a, mihring tam lam phu lovin . two wheeler taxi hi a tam ta hle tih a hriat theih awm e.
Taxi pangngai (4wheeler) an tam tawh em avangin khawpui traffic tih thawl a ngai tiin intlanchhawk system kalpui a ni a. Mipui harsatna chhawk zangkhai nan tiin two wheeler taxi permit pekchhuah a ni leh a. Aizawl traffic harsatna avang bawkin two wheeler taxi te pawh intlanchhawk system hmantir a ni leh a. Chutiang bawkin private vehicle-ah pawh intlanchhawk system siam a ni bawk. Nambar indawt dana intlanchhawk siam a nih avangin, a nei zote chuan nambar dang duhin two wheeler an lei belh a, intlanchhawk system hman ni mah se, lirthei veivak a tlem phah hleithei ta lo a ni.
Tun dinhmunah Mizoram puma two wheeler hrim hrim register zat hi 2,16,213 (2024 June 30 thleng) a ni a. Directorate of Economics and Statistics record-a a lan danin 2022 khan two wheeler register zat hi 2,01,459 a ni a. A karah kum khat leh thla thum a tla a, chu chu thla 15 a ni. Thla 15 chhunga two wheeler register zat hi 14,754 tihna a ni a, thla tin two wheeler 983.6 register a ni a, ni tin 32.7 register tihna a ni. Aizawl distrct bikah hi chuan ni tin 50 vel register ang a ni.
Private tana lirthei neih theih zat bituk a awm loh laiin, commercial atan chuan bituk zat a awm thei a, commercial permit pekchhuah chungchangah hian thuneitute hian behchhanah population hmang thei thin se, harsatna tam tak hi chu a pumpelh theih awm asin.