Mbappe-a’n No 9 a rochun dawn

France forward langsar Kylian Mbappe chuan kar tharah hian Real Madrid a zawm fel tawh dawn a, a club tharh No. 9 a ha dawn. Los Blanco hian an player jersey no 9 paruk vel an lai an thlakthleng kual dawn.
Forward ropui, tunlaia forward tha ber zinga mi Kylian Mbappe hian PSG-ah contract a hmang zo va, contract thar ziak lovin chhuah a thlang. Hun rei tak lak tuma lo hel tawhtu Real Madrid nen an indawr fel thuai a, khawvela football club ropui leh hlawhtling ber Real Madrid hian sum seng lovin Mbappe an la lut. Real Madrid nen an indawr fel hnuin Euro 2024 a khel zui leh a, Euro atanga an tlak hnuin Santiago Bernabeu a pan tak tak tawh dawn.
France team ah Jersey No 10 ha thin leh PSG a No 7 ha thin Kylian Mbappe hian Real Madrid-ah No 9 a ha dawn. Real Madrid-ah No 9 hi an player ropui Alfredo Di Stefano, Ronaldo Nazario, Cristiano Ronaldo leh Karim Benzema ten an lo ha tawh thin. Mbappe-a’n France tana a khelhpui thin Benzema hian kum 2023 khan Real Madrid a chhuahsan a, a hak thin No. 9 hi ha awm lovin a awl rih. Benzema hak thin No 9 hi Mbappe hian a rochun dawn a, a inhmeh viau tura ngaih a ni.
Mbappe no 9 tur tihchian a nih rual hian France midfielder Aurelian Tchouameni chuan Casemiro, Xabi Alonso leh Guti te hak thin No. 14 a ha tawh dawn a. Jesus Vallejo chuan Tchouameni-a hak thin No 18 a ha ang a. Euro 2024 a chetha tak Turkish rawlthar Ada Guler chuan season liam taah No. 24 ha mah se season tharah chuan No. 15 a ha ve tawh thung ang.