AR chhuahna tur MoU siamah Mizoram rawn loh hi a dik lo – MPCC sr vice president

Aizawl atanga Assam Rifles chhuahna tura sawrkar laipuiin inremna thuthlung (MoU) a siam chu Mizoram lam rawn loa tih a nih chuan a dik loa, an chhuahsan vek lo a nih chuan chhuak lo law law se a dik zawk tih Congress senior vice president Lalnunmawia Chuaungo chuan a sawi.
Zirtawpnia Congress Bhavan-a inkhawmah Lalnunmawia Chuaungo chuan, Union Home minister-in Assam Rifles sawnna tur MoU ziah tawh karkhat chhunga chinfel tum a ni, tih a rawn hrilh chungchangah, sawrkara a awm ve lai khan state sawrkar siam MoU draft an thawn a, central lam an ngawi hmiah a. Chutih laiin central hian MoU tur an lo siam ve a, mahse ziakin Mizoram a pe loa, an draft ang chuan – Loch House, Quarter Guard leh Mandir hi chhuahsan an tum lo niin a lang tih a sawi. Mizoram sawrkar atang chuan Assam Rifles leh Ministry of Home-ah reminder an thawn thin a, chhanna an hmu ngai lo tih a sawi bawk.
Union Home minister-in a ram neitu Mizoram mipui rawn loa MoU a rawn finalise tur chu a dik loa, sawiho hnu ah state sawrkar nen an duang tur a ni tih MPCC hruaitu hian a sawi. “Mizoram sawrkarin acre 1007 a pe a, Assam Rifles-in an luah sa mek hi acre 60 vel chauh a ni. Sawrkara ka awm ve lai khan inchi khat pawh in chhuahsan turah hian in chang zui loang, tih kha ka hrilh dan a ni. Chuvang chuan an MoU siam ve hi state sawrkar a rawn thawn lo a nih ka ring,” a ti.
Hemi chungchang hi Mizoram interest a ni a, mipui interest a ni a; Loch House, Quarter Guard leh Mandir hi an chhuahsan duh lo a nih chuan chhuak lo mai se tih a chah duh tih a sawi a ni.
July 4-a chief minister hoa Assam Rifles insawn chungchangah an sawihonaah minister pali-in an tawiawm laiin, AR atang chuan IGP a tel a; IGP level nena sawiho tur chuan chief secreatry chin nena sawiho tur a ni tih tih Lalnunmawia Chuaungo hian a sawi. “Protocol a awm a, sawrkar function-a thil pawimawh a ni. Assam Rifles IGP dawr tura CM-in amah tawiawm tura minister 4 a hruai hi tih dan phung a ni loa, Mizoram sawrkar an timualpho. Sawrkar anga indawrnaah IGP level chief secretary khan a lo dawr tur a ni a, chu chu international level thlengin tih dan phung a ni. Hetianga a tih hian chief minister hian a hnuaia office dinhmun a tihniam a ni,” a ti.