Society thawhpui tlak an tlem – Cooperation minister
Mizoram sawrkarin a policy tihhlawhtlin a tumnaah cooperative society-te tha chakna rin a tum laiin, society thawhpui tlak an tlem tih Cooperation minister PC Vanlalruata chuan a sawi.
Champhai Large Area Multipurpose Society (LAMPS) chuan lawmman pahnih – National Cooperative Development Corporation (NCDC) Regional Awards for Cooperative Excellence and Merit 2023 leh Mizoram Cooperative Apex Bank (MCAB) Best Cooperative Society 2023-24 an dawn chu chu Inrinni khan an lawm a. Hmanpuitu Cooperation minister chuan Mizoram sawrkarin Hand Holding policy leh thlai thar lei tihhlawhtlin nan cooperative society-te tha chakna rin a tum a. Amaherawhchu society thawhpui tlak an tlem a, society din thar leh tihchak kawngah tan lak a ngai tih a sawi.
Hun reiloteah State Level Cooperative Development Council din a ni dawn tih sawiin, district tinah District Level Cooperative Union din tum a ni a; society enkawlna inkhaidiat mumal tak a awm chuan society nung tha tak tak khaw tinah an awm chhoh theih a beiseiawm tih a sawi a ni.
Champhai LAMPS-in lawmman an dawng leh, chhum lo chat loa kum 43 chhung society nung tak an kalpui thei chu midang tan entawn tlak a ni tih a sawi a. Khawchhak tlangdungah society nung tak tak – Champhai LAMPS, Champhai Town Multipurpose Cooperative Society leh Vaphai Primary Agriculture Credit Society hmalakna chu ropui a tih thu a sawi bawk.
Agriculture minister ni bawk PC Vanlalruata chuan, kuthnathawktute hmakhua ngaiin sawrkarin thlai sawngbawlna lian zawk din tumin hma a la mek a. Cooperative society-ten heti lama hma an lak duh chuan sawrkar a inhawng hle tih a sawi a ni.
Minister hian a enkawl department – Agriculture leh Irrigation & Water Resources (I&WR) hnuaia pisa pahnih – District Agriculture Office leh Executive Engineer I&WR office chu Inrinni zing khan a tlawh a. Thawktute nen inkawmin department hmalakna leh hmachhawp an sawi ho.
New Champhaia Agriculture department ram leh Champhai LAMPS-in NABARD atanga cheng vaibelchhe 1.3 an hmuh hmanga an din agriculture infrastructure building pawh a tlawh a ni.