Charity volleyball match a hlawhtling

Mizoram Volleyball Lovers (MVL) huaihawta leimin tuarte tanpuina tura charity volleyball match khelh chuan hlut a hlawhin, a hlawhtling hle tih MVL lamin an tarlang.
Inrinni zan khan R. Dengthuama Indoor Stadium, Mualpuiah mipui 3,000 vel laiin ticket leiin a hmunah an en a, LPS leh Zonet kaltlangin live-a entu an thahnem hle bawk tura ngaih a ni.
Ticket hi dawr hrang hranga dah a nih bakah ticket lei kher lote tan pawha luanchhuahna (QR code) siam a ni a, he mi kaltlanga tanpuina pe an awm nual bakah mimal zuar an awm bawk avangin he thu buatsaih lai hian pawisa tlingkhawm zat chiah hriat theih a la ni loh thu leh Nilaini velah an tihfel theih a rinawm thu inkhel huaihawttute’n an sawi.
Inrinni zan dar 6 khan inkhel hmasa zawkah Mizorama comedian leh youtuber hriat hlawh inpawlh leh celebrity kan neihte an inkhel a; youtuber leh comedian inkawp hi Team Blue niin, celebrity lam hi Team White an ni ve thung a, inkhel hmuhnawm takah 3-1 (15-11,15,11,7-15,12-15,15-7)-in Team White an chak.
He charity match programme hi Mafeli Hlawndoin a kaihruai a; zan dar 7:30-ah tunhnaia volleyball player hriat hlawh boral ta pahnih J. Hmangaihthanga leh Lalbiakhluate sunna hun hman niin, Mizoram Olympic Volleyball champion team leh MVA All Star inkhelin a zui a, Mizoram Olympic Volleyball champion hian 3-1 ( (25-20, 23-25, 25-20, 25-19)-in MVA All Star team an hneh.
Match pahnih khelh zawh hian concert-in a zui a; tunlai zaithiam engemawzat an inlan.
Charity Volleyball Match hlawhtlinna’na mi inphalte chungah Mizoram Volleyball Lovers chuan lawmthu an sawi.