Chhungkaw pawnlama hlimna um hian chhungkua a tichhia – Lalnghinglova Hmar

Chhungkaw pawn lama hlimna um thinna chuan chhungkua a tichhe thin a, chhungkuaa hun hman tam leh inpawhna tha neih a pawimawh tih minister Lalnghinglova chuan a sawi.
MHIP Tuikual South Branch chuan Nilaini khan an kum 50 tlin, Golden Jubilee an lawm a. Bialtu MLA, minister Lalnghinglova Hmar hian hmanpuiiin, MHIP member 1617 awmna branch an nih angin khawtlang tihhmasawn leh siamthat kawngah MHIP hmalakna chuan awmze thui tak a neih ngei a ring tih a sawi a. MHIP thuthlung pakua chu midangte tana entawntlak ni thei tur khawpa a tak a nunpuitu nih tum turin a chah. Chhungkua leh khawtlang tihhmasawn kawngah nu ber mawhphurhna chu mawhphurhna pawimawh ber zing ami a ni, tiin, nu ber ngaihpawimawh leh rilru pek tamna azirin hmasawnna a chakin a chak lo thei tih a sawi a ni.
Zirna, hnathawhna hmunah leh inelna hrang hrangah hmeichhiahten hotu leh hmahruaitu nihna dinhmun an luah nual tawh tih minister hian sawiin, “Ram roreltu ni tur pawhin mipuiin hmeichhiaah rinna thui tak an nghat ngam tawh a. Chhungkua leh khawtlang tihmasawntu nih tum zelin, in pawimawhna hre chungin hmalam pan zel rawh u,” a ti.
Golden Jubilee lawmnaah hian Tuikual South MHIP member kum 70 chin chunglam hnenah thilpek hlan an ni a. An branch-ah hian member 1617 an awm a, kum 70 chunglam 50 an awm a ni.