Zorina MV thar nen rawn kir leh dawn ta

Zorinsanga Sailo chu aw bawm vung avanga a thawm a reh deuh vang vang hnuah music video thar nen a rawn inlan leh thei dawn ta a, nakzanah a music video thar ‘Min hruai turin ka thlang ber che’ tih hla chu a tichhuak dawn ta a, Zonet music channel-ah leh T. Laldintluanga YouTube cannel-ah a en theih ang.
Zorina hi Synfo leh CK|P buatsaih, solo competition Praise On 2016 Pahnihna niin, Mizo gospel music khawvelah a hming a chher zui viau a, tun tuma a music video tur hla phuahtu hi Synod Choir conductor thin, hla tha tak tak lo phuah nual tawh T. Laldintluanga phuah niin, Zorina chuan, “He hla hi ka tleirawl chhoh ve laiin Ramhlun North Bial Zaipawl-in an sak thin atanga ka hriat a ni a, khang hunlai atang tawh khan a thu leh a thlukin min hneh em em a, tun hnuah ngaihthlak tur mumal tak a awm loh avanga siam thar leh ka ni,” a ti.
Zorina chuan, “Rei tak zai thei loin, aw bawm vung avanga ka buai char char avangin hrewm ka ti thin em em a, mahse, tunah hla thar tha tak leh mawi tak ka nei thei hi ka lawm a, mi dang tan malsawmna lo ni mawlh rawh se,” a ti.
He hla hi Dina hian 2014 kum chawhnu her tawh lama a phuah niin, a hla thupui ang hian nun hruaitu tura Lal Isua sawmna hla a ni a, Dina chuan, “ He ka khualzin kawng khawvela ka cham chhung hian zing ka thawh atanga ka mut dawn thleng hian Lal Isua laka ka pen bo theihna tur kawng pengthuam dang a tam hle a, a chang chuan kawng dik hrulah ka lo peng kawi leh fo thin. Ka phone screen a lo lang thin te mai pawh hi ka bo phah thei reng mai. Khawi hmunah pawh awm Pathian a ni tih te hi ka lo mangnghilh leh thin. Chuvang chuan he ka zinkawng bum boh taka min hruai turin Isua ka sawm fo hi a lo tul hle a ni tih ka rilruah alo lang a.
“Ka nun hi chhum reilote lo lang a ral leh mai thin ang hi a ni a. Pangpar mawi te an chuai leh mai thin ang hian ka la chuai ve thuai dawn a. Reilote hlimna chena khawvel lama tlan ai chuan ka thlang zel dawn che Lal Isu ti a inhlan mawlh mawlhin tawngtaina nen he hla hi ka lo phuah chhuak ta a ni,” tiin he hla a phuah dan hi a sawi a ni.