Bangladesh zirlaite lungawi lo

Bangladeshi student group te chuan July 28 khan an hruaitu lung ina khung leh police custody-a awm mek te chhuah zalen an nih loh chuan ram pum huapa lungawilohna an lantir leh tur thu an puang.
Bangladesh-a zirlai ten lungawilohna an lantir avanga nunna chan mi 205 an awm tawh a, Prime Minister Sheikh Hasina-i’n kum 15 chhung rorelna a lekkawh chhunga lungawilohna turu ber a ni bawk.
Army te chuan patrol la nei rengin rampum huapin curfew puan a la ni bawk a, police-te chuan mi sang chuang manin chung zingah chuan zirlai hruaitu te pawh an tel a ni.
Students Against Discrimination group te job quota system tihtawp ngiata chetla te chuan an demand tihhlawhtlin a nih loh chuan lungawilohna an lantir leh tur thu an sawi a.
Group chief Nahid Islam leh midang te laka thubuai ziah luh chu hnuhkir vek phutin chhuah zalen an ngiat bawk tiin coordinator Abdul Hannan Masud chuan a sawi a.
Abdul hi biru mek niin a awmna a sawi lang duh lo va, lungawilohna thihnaa inhnamhnawihna nei Government Minister leh police officer te lakah hremna lekkawh an phut thu a sawi bawk a.
“Chutiang a nih loh chuan Students Against Discrimination chuan July 29 atangin lungawilohna kan lantir leh ang,” tiin a sawi.
Nahid Islam leh protest group senior member pahnih te chu July 26 khan capital Dhaka a hospital atanga hruai chhuah luihin an awm a, an awmna chin hriat a ni lo mek a ni.
Home Minister Asaduzzman Khan chuan July 26 khan mi pathum te chu an him zawk nan tiin police custody a dahin an awm tiin a sawi thung.
Bangladesh-a buaina chhuak avangin mi 9,000 chuang manin an awm tiin Bangladeshi newspaper Prothom Alo chuan a tarlang bawk.