Hamas ten Yahya Sinwar thlang

Ni hnih chhung ngun taka Doha khawpuia an ngaihtuah hnuah Hamas te chuan kar kalta lawka Tehran khawpuia tihlum Ismail Haniyeh thlak turin Yahya Sinwar chu an thlang ta.
Kum 2017 atang khan Sinwar hian Gaza strip ah group leader nihna a chelh tawh a, tunah chuan Hamas political wing a kaihruai tawh thung dawn a ni.
Doha khawpuia inhmuhkhawmnaah hian Hamas te chuan an group political wing kaihruai tur hian Yahya Sinwar mai bakah Mohammed Hassan Darwish, General Shura Council, Hamas’s Politburo thlangtu hotu pawh an ngaihtuah zingah a tel a.
Mahse vote lak a nih hnuah Sinwar zawk chu thlan niin hei hian Israel huatna an neih lenzia a pholang anga ngaih a ni.
“Inremna awm theih nana inpawt fan thei Haniyeh an tihlum a. Tunah chuan Sinwar leh military leadership an hmachhawn tawh ang” tiin Hamas official pakhat chuan a sawi.
A thih hma khan Ismail Haniyeh kha regional diplomats te chuan Hamas leader dang te ang lo taka inpawt fan thei leh politics lamah pawh awmze nei taka chet la thiam an ti.
Yahwa Sinwar erawh Hamas hotu lawk zingah pawh extreme ber zinga ngaih a ni thung. Sinwar chu Israel most-wanted list ah pawh a chung bera awm a ni a. 7 October 2023 a Israel chhim lam beiha mi 1,200 chuang in nunna an chan phahna chhan pawh kha Sinwar ruahman nia ngaih a ni.
“Terrorist Yahwa Sinwar chu Ismail Haniyeh thlaka Hamas leader atana ruat a ni hian amah leh he pawl tenawm tak hi he lei atanga nuaibo a tulzia a pholang a ni” tiin Israeli Foreign Minister Israel Katz chuan a sawi a.
“Yahwa hi firfiak history pawha firfiak chetna rapthlak ber ber kalpuia mawhphurtu a ni” tiin Israel Defense Forces spokesperson Rear Adm Daniel Hagari chuan Saudi news channel Al-Arabiya hnenah a sawi.
Nikum October atang khan Sinwar chu mipui hriatah a inlan tawh lo hrim hrim a. Gaza-a underground in chhawng 10-ah a awm nia ngaih a ni tiin June thla khan US Secretary of State Antony Blinken chuan a sawi.
Kum 1962 khan Gaza-a Khan Younis refugee camp ah a piang a, kum 1980 chho khan Sinwar chuan Hamas security service Majd tih chu a din a, he pawl hmang hian Palestinian te Israel nena thawk dun te chu an thlurbing a ni.
A nun hun tam ber chu Israel lung inah a tang a, kum 1988 khan man a nih tum thumnaah dam chhung lung in tang tura tih a ni a. Mahse, Kum 2011 a Hamas tena Israel sipai Gilad Shalit kum nga chuang an hren tawh leh Palestinian lung in tang 1,027 te inthleng zingah a tel hlauh a ni.
Kum 2017 khan Gaza Strip-a Hamas political bureau head ah ruat niin tun thlengin chu dinhmun chu a chelh a. US pawhin Sinwar chu ‘international terrorists’ a tih zinga tel a ni bawk.
Gaza-a Islamic university graduate niin Israeli jail-ah kum 23 lawih a tan chhungin hebrew a thiam nal hle a. Israeli culture leh society pawh hrefiah tak a ni bawk.
Hamas military wing Ezzedine al-Qassam Brigades senior commaner a nih hnuah Gaza-a Hamas thuneitu ber a ni zui leh a ni.
A thlak tak Haniyeh kha chuan Hamas te chu khawvel hmachhawn zelna turah moderate zawka kalpui a duh laiin Sinwar thung chuan Palestiian issue chu tharum hmanga kalpui zel duh zawk a ni bawk.
Sinwar duh ber pakhat pawh single palestinian state din niin Gaza Strip leh West Bank, Mahmud Abbas Fatah party tena an enkawl mek leh east Jerusalem te chu belhbawma Palestinian state din a duh a ni.