Rul hmuhchhuah tharin Mizoram hming a chawi

Mizoram University-a Department of Zoology head Prof HT Lalremsanga leh asst. professor Dr M Vabeiryureilai chuan India ram hmun hrang hrang leh Max Planck Institute Germany-a an thawhpuite nen Mizorama rul chi hrang hrang pianphung leh DNA chifang an zirchianna atangin species thar an hmuchhuak a; a hmingah Mizoram hming chawiin ‘Smithophis mizoramensis’ tiin an vuah. He an zirchianna hi scientific journal, Diversity Switzerland chuan August 7 khan a chhuah a ni.
Khawvel huapah Smithophis genus hnuaiah India hmarchhak leh China chhimlam atangin species pali hmuhchhuah an ni tawh a. Heng zinga species pahnih – Smithophis atemporalis (kum 2019-a Mizorama hmuhchhuah) leh Smithophis bicolor chu Mizoram atanga record ni tawhin, tuna species thar nen hian khawvel pum huapin species 5 hmuhchhuah a ni ta tih Prof HT Lalremsanga hian a sawi.
He rul chi thar hi kum 15 liamta atang khan Mizoram hmun hrang hrang atangin zirchian atan vawnthat zel an ni a, a laichin hnai species dang nen thliarhran a harsat avangin rei tak buaipui a ni nghe nghe tih a sawi. Heng an laichin hnaite anga ngaih nen hian an DNA ah zaa 10 atanga 14 in an danglam bakah an rawng leh phuhlipah an danglamna hmuhchhuah a ni.
Mizoram tlangram hmun hniam atanga hmun sang luikawr tuithiang leh a chhehvelah hmuh thin a ni a. A scientific name atan khawvel scientific huapa Mizo hnam leh Mizoram chawilar nan ‘Smithophis mizoramensis’, a Mizo hmingah ‘Tuithiangrul’, a Sap hmingah ‘Mizo Brook Snake’ tiin an phuah tih Prof HT Lalremsanga hian a sawi a ni.