Mizoramin project a kalpui mek leh EAP hnuaia kalpui tur thlir

Chief minister Lalduhoma hoin Ningani khan sawrkar hotute chuan state-in project a kalpui mek leh hmachhawp bakah, Externally Aided Projects bika a kalpui mek leh kalpui tura hmachhawp te thuanghniha thutkhawmin an sawi ho.
Bairabi to West Phaileng inkara 132 kV SC line hnathawh forest clearance bawhzui dan tur, Pukzing leh Silsury inkar kawngpui zauhna tur forest clearance hmalak tawh chin, Tualpui leh Champhai inkar kawngpui siam tura forest clearance atana hmalak tawh chin an sawi a. Heng project-a thil pawimawh dang pawh an sawi bawk.
Thutkhawmah hian PWD minister Vanlalhlana, EF&CC minister Lalthansanga, P&E minister F Rodingliana, adviser to CM TBC Lalvenchhunga, chief secretary Dr Renu Sharma leh a kaihhnawih department official-te an tel.
Hei bakah hian chief minister ho vekin Mizoramin Externally Aided Projects kalpui mek leh kalpui tur hmachhawp sawiho a ni a. Project kal mek bawhzui zel dan tur, Department of Economic Affairs-in loan puk theih zat a bituk chhunga insiamrem dan tur leh project thehluh tura duan Council of Ministers-in a ngaihtuah hmabak la awmte an thlirho.
Thutkhawmah hian EF&CC minister Lalthansanga, Tourism minister Lalrinpuii, P&E minister F Rodingliana, Sports minister Lalnghinglova Hmar, adviser to CM TBC Lalvenchhunga bakah chief secretary Dr Renu Sharma leh project kaihhnawih department official-te an tel a ni.