AMC Ward No.VI corporator thlan turah candidate pathum

Aizawl Municipal Corporation Ward No.VI corporator hmun ruak luah turin August 22 hian by election neih a ni dawn a. Candidate pathum an awm dawn.
ZPM party chuan an candidate tur an puang hmasa ber a. MNF leh MPCC chuan candidate an intawm dawn a ni. BJP Mizoram chuan Ningani khan an candidate tur an puang a. BJP Aizawl District general secretary Chawnghmingthanga, Zarkawt chu ruat a ni.
An candidate puangtu BJP State president Vanlalhmuaka chuan, enchhin ngai loa an candidate hi thlan tlin a nih ngat chuan Ward-Vl huamchhung veng pathum bakah MNF kaihhruai mek AMC tan pawh malsawmna kawng a inhawng dawn a. Development fund haichhuah kawngah leh development hna thawh kawngah Ward chhung mipui tan a a tha ber dawn tih a sawi a ni.
BJP candidate Chawnghmingthanga bakah ZPM official candidate H Lalremtluanga, Chanmari West chuan Ningani khan returning officer, addl DC Mark Lalthanliana hnenah nomination paper a thehlut a. MNF – MPCC common candidate Lalrinfeli, Chanmari West chuan Nilaini khan nomination hi a lo thehlut tawh a ni.
Tarlan tawh thin angin AMC Ward No.VI corporator John Zosangliana chu kumin March 21 khan a boral thut a. A hmunruak hnawhkhahna turin State Election Commission chuan by election neih turin a ti. MNF-MPCC candidate intawm hi John Zosangliana nupui a ni.