Handloom Day pualin puantah pho

NABARD Mizoram Regional office chuan Ningani khan Aizawl khawpui kawngpui dungah National Handloom Day lawmna buatsaihin puantahtute tan an thil siam phochhuahna stall a ruahman
NABARD general manager, officer -in- charge Pankaja Borah chuan kumtin August 7-a hman thin National Handloom Day tobul leh a pawimawh dan a sawifiah a. Puantahtu leh kutthemthiamte hmalakna chhuanawm tiin, handloom leh handicraft tihhmasawn nana NABARD atanga scheme hrang hrang awmte a sawi. Heng zingah hian puantahtute tana skill training leh capacity building, an siam chhuah danglam bikte GI registration tih leh market zau zawk an neih theih nana online digital platform-a phochhuahte a tel.
Mizoram University atanga tel Prof Rama Ramaswamy chuan handloom sector chu agriculture sector dawta economic activity lian ber a ni, tiin, puantahtu nuai 30 chuang tan eizawnna leh sum lakluhna hnar a siamsak tih a sawi a ni.
National Handloom Day pual hian NABARD chuan state puma puantahtu pawl hrang hrang tan stall 14 a ruahman a. Hemi atan hian NABARD NGO partner, Angel Business Promoter of Mizoram chuan tul leh pawimawh a buaipui a. Mizorama handloom sector ziarang leh hausa tak bakah sum leh pai dehchhuah kawnga a pawimawh dan pholan a ni.