Bitumen-ah bio-bitumen 35% pawlh

Union Road Transport Minister Nitin Gadkari chuan sorkarin petroleum-based bitumen ah 35% lignin pawlh a remti tawh dawn tiin a sawi.
Bitumen (alkatra) hi crude oil thlitfim atanga chhuak niin kawngpui leh inchung khuh nan te hman nasat a ni.
“Khawvelah road network kan nei lian ber a. kawngpui 90% te hian bituminous layer an hmang a ni. Kum 2023-24 khan Bitumen 88 lakh tonnes kan hmang a. Kum 2024-25 ah 100 lakh tonnes kan hmang turah kan ngai a. Bitumen 50% hi ram dang atanga chawkluh a ni a, kum khata lakluh nana kan sum sen chu Rs 25,000-30,000 crore vel a ni” tiin Gadkari chuan Rajya Sabha a zawhna a chhang ani.
Minister chuan loneitute chuan foodgrains mai an thar tawh lo energy producer pawh an ni tawh a ti a. Central Road Research Institute (CRRI) leh Indian Institute of Petroleum, Dehradun te chuan paddy straw (buh kuang) atangin bio-bitumen an siam a ni a ti bawk a.
“Paddy straw one tonne hian bio-bitumen 30%, bio-gas 350 kg leh biochar 350 kg a siam chhuak thei” tiin Minister Gadkari chuan a sawi bawk a, bitumen ah bio-bitumen 35% a chawhpawlh theih a ti a. “Chu mi avanga foreign exchange saving chu Rs 10,000 crore a tling dawn a, patent pawh kan thehlut tawh” tiin Minister chuan a sawi bawk.
Gadkari chuan petroleum-based bitumen chu Rs 50 per kg a nih laiin biomass (rice straw) atanga siam bio-bitumen chu Rs 40 per kg a ni thung a ti bawk.
Gadkari chuan Indian Oil Corporation chuan Panipat ah peoject kalpuiin ni tin rice straw atangin one lakh litres ethanol an siam chhuak a, hei bakah hian ni tin bio-bitumen 150 tonnes leh bio-aviation fuel 88,000 tonnes ni tin an siam chhuak a ti bawk.
“Rice straw te Bio-CNG a siam a nih theih nan hian project 450 kan kalpui mek a, ligning project kalpui mek a ni. Ka department chuan notification tichuak vat dawnin lignin chu petroleum bitumen ah 35% hman remtih a ni dawn a ni” tiin minister chuan a sawi bawk.
Gadkari chuan project 450 an kalpui te chu Haryana, Punjab leh Western Uttar Pradesh ah te a nih thu sawiin biomass te chu bio-CNG ah letin lignin kan nei thei ta a ni a ti bawk a.
“Chungte chu kan lei der tawh a, order pawh kan tichhuak tawh a. Ram dang atanga kan lakluh kan tihtlem theih dawn mai bakah air pollution nasa takin a tihniam dawn a. Chutihrualin, loneitute tan a hlu bawk” tiin a sawi a. Loneitute chuan rice strw te chu tonne khatah Rs 2,500 zelin an hralh thei dawn a ti bawk.
Gadkari chuan NHAI chuan ecology leh environment humhim a nih theih nan eco-friendly taka an kalthu sawi bawkin, “Fly ash kan hmang a, bamboo crash barrier 86km kan hmang bawk a, plastic, rubber waste te bitumen ah kan hmang bawk a, steel slag pawh kan hmang a ni” tiin a sawi bawk.
Ziaka chhanna an pekah ministry chuan research project pahnih IIT Roorkee leh Central Road Research Institute (CRRI) New Delhi te chuan Indian Institute of Petroleum (IIP) Dehradun te nena tangtlangin laboratory ah bio-bitumen chu an zirchian thu tarlan a ni bawk a.
November 2022 khan Shamli-Muzaffarnagar Section of NH-709AD a hun thenkhatah enchinna kalpui niin kum thum chhung bio-bitumen chu road construction ah a tha em tih an enfiah dawn bawk a. NHAI chuan bio-bitumen chu Jorabat-Shillong section of NH-40 ah hman a tum bawk.