Ramri vanga state pahnih inbia in ramri buai lai la sawi kai lo

Ramria buaina neih avanga Mizoram leh Assam sawrkar aiawh inbia chuan ramri buaina lai an la sawi thleng lo a, ramri bulhnaiah buai a awm lohna tura hma lak dun zel nise, an ti. March 2025 ral hmaa Guwahati-a ministerial level-a inbiak leh nise an ti bawk. “Goodwill Mission” tih hming vuaha state pahnih sawrkar aiawh inbiak tum 4-na hi Zirtawpni tlai khan Aizawlah neih a ni a. Mizoram hi Home minister K Sapdanga’n hoin Assam lam hi Border Protection and Development minister Atul Bohra chuan a rawn ho a. Darkar thum chuang an inbiak hnu ah zan dar 7 velah an zo a ni.
State pahnih sawrkar aiawhte chuan thuchhuah intawm an siam a. Thuthar thehdarhtute zawhna chhangin Assam minister Atul Bohra chuan an chief minister Himanta Biswa Sarma chuan a thenawm state-te nen inrem taka awm a duh a, ramria buaina awm pawh chinfel a duh avangin he hmalakna hi kalpui mek a ni tih a sawi a. Tun tuma Mizoram sawrkarin a lo dawnsawn danah leh inbiakna boruakah an lawm hle tih a sawi a ni. Inbiakna hmasaa sawi tawh te kengkawh zel chungin, ramri chungchanga state pahnih sawrkar ngaihdan lam erawh tunah rih chuan sawi thlen a la ni loa, inbiak chhoh zelnaah a tul anga la sawi a nih a beisei tih a sawi a ni.
Mizoram Home minister pawhin political level-a inbiakna a ni a, ramri china ngaih, tih lam, technical thil chu tunah rih chuan sawi kai a ni loa, technical thil hi chu state pahnih sawrkar official-ten an la sawi dawn tih a sawi. “Goodwill Mission” a nih angin, state pahnihte inrem taka awm zelna tur lam chu tuna an sawi leh hmalakna tur chu a ni rih tih a sawi bawk.
Mizoram sawrkar aiawh hian Home minister bakah Land Revenue & Settlement minister B Lalchhanzova, Home secretary Vanlalmawia, addl. secretary Joseph H Lalramsanga leh Home department official-te an tel a. Assam sawrkar aiawh hian Border Protection & Development minister bakah hian Border Protection & Development principal secretary Gyanendra Dev Tripathi, IAS; secretary Prabhati Thaosen, IAS; director Subhalaxmi Deka, ACS leh official dangte an tel a ni.

Mizoram – Assam sawrkar thuchhuah intawm

8 2024 August 9-a Mizoram sawrkar leh Assam sawrkar inkara ‘Goodwill Mission’ hnuaia inbiaknaah hian 2024 February 9-a Assam leh Mizoram chief minister ten state pahnih inkarah inhriatthiamna leh duhsakna nena ramri buai chinfel a nih theih nan inhrethiam tawn taka boruak tha tak hnuaia hma lak thin nise tia thu an lo dah chu nemngheh nawn a ni.
8 State pahnih chuan ramriah remna leh muanna vawn chhunzawm zel nise, thil duhawm lo a thlen loh nan hma lak nise, an ti a. Ramri hnaih district thuneitu ve ve ten a khat tawkin Joint Cultural leh Sports Festival ang chi te buatsaih thin se, hemi tur hian 2025 January 31 ralhma ngeia hma lak nise, an ti.
8 State pahnih aiawhte chuan, thutkhawm hmasak ho atanga thuchhuah intawm siam tawhte tih hlawhtlin nan hma lak zel an tum a. Hmachhawp hrang hrang siam tawhte tih hlawhtlin nan sawrkar official-te bawhzui tura tih a ni. Chu’ng hmalakna bawhzuina ennawnin thutkhawm thin tura tih a ni. Minister kaihhruai thutkhawm hi 2025 March thla ralhmaa neih leh tura tih a ni.
8 State pahnih hian ram dang atanga kuhva ro tawlh chungchangah tumah ngaihnathiamna nei loa khauh taka hma lak chhunzawm an remti a ni.
8 Assam leh Mizoram inrina bialtu bawrhsap-te leh superintendent of police ten inter-state border (ramri hrul) ah remna leh muanna a awm reng theih nan thlatin inbiak hmuh theihna hmanga sawikhawm thin tha tih a ni a; thla 6 danah dawhkan kila thutkhawm thin tura rel a ni.
8 State pahniha palaite hian ramri buaina chinfel kawngah ramri hrula chengte an pawimawh zia hria in, an ni nena tha taka thawhho a tul tih an pawm a. Ramri kaihhnawih buaina leh harsatna a awm reng rengin, ramri hrula cheng mipui leh a kaihhnawih zawng zawngten anmahni thua hma la nghal mai loin, thuneitute hnenah thlen thin se, tih a ni.