MP-in ASF hrileng vanga vawk thi neitute tan chhawmdawlna dil sak

Parliament Session neih mekah Mizoram Lok Sabha MP Richard Vanlalhmangaiha chuan Mizorama vawk hrileng avanga vawk thi neitute harsatna sawichhuakin, tun thlengin sawrkar laipuiin chhawmdawlna a la ngaihtuah sak loa, state sawrkarin cheng vaibelchhe 26 chuang project proposal a thehluh chu tih fel sak ngei turin a ngen.
18th Lok Sabha Parliament Session neihah Zirtawpni khan Mizoram MP hian ‘zero hour’ ah hun a hmang a. Official record-a a lan danin kumin February atanga vawiin thlengin African Swine Fever vangin Mizoramah vawk 8251 an thi tawh a, 15000 chuang suat an ni tawh. Hemi avanga vawk vulhtute sum luangral zat chu cheng vaibelchhe 200 chuang a ni,” tiin, hrileng vanga vawk thi la chhinchhiah loh engemawzat a awm tih a sawi.
Tunhnai mai ni lo, tunhma atang tawhin ASF hian Mizoram a tibuai tawh tih sawiin, vawk vulhtu tam ber chu loan hmanga ran vulh eizawnnana hmang an ni a, an tawrhna a nasa tih a sawi a ni.
Union minister of Animal Husbandry chu ASF avanga Mizoram tawrhna chungchangah chhawmdawlna ngaituahpui tura ngenin, “Vawk vulhtute chhawmdawlna tur project proposal cheng vaibelchhe 26.725 sawrkar laipuiah thehluh a ni tawh a, hetihlai hian vawk thi leh vawk suatte avanga vawk vulhtute chhawmdawlna tur sum engmah dawn a la ni lo,” Richard Vanlalhmangaiha hian a ti. Ngaihtuahna seng a, Mizorama vawk vulhtute harsatna hriatthiampui a, hma lakpui thuai turin sawrkar laipui leh Union minister hi a ngen.