Games village atanga hnawhchhuah Paraguayan swimmer leh Neymar !!

Games village atanga hnawhchhuah
Paraguayan swimmer leh Neymar !!
A thiante intihsiak lai tawiawm loa Paris khawpuia a lo teihawi kual vel avanga Paris Olympic Games Village atanga Paraguay Olympic team lamin an thawnhaw nia sawi Paraguayan swimmer chhe lo zet Luana Alonso chuan Fox Sports Mexico kaltlangin chanchin bengverh zet a nei zui leh hlak a, Brazilian footballer Neymar Junior chuan tunhnai khan Instagram lamah private message a thawn niawmin a sawi!
Alonso sawi danin Neymar hnen atangin ‘message (DM) min lo thawn teh’ tih a dawng a niawm a, he thu hi Paraguay contingent tana boruak duhawm lo a thlen avanga Summer Games village atanga an hnawhchhuah atanga ni reilote hnua a sawichhuah a nih avangin a thusawi hian ngaihven a hlawh zual a, night club leh a chheh vela chanchin sawi tur nei ve laih tawh Neymar-a hming a rik tel avangin ngaihven a hlawh lehzual lo thei lo.
Fox Sports Mexico tarlan dan chuan, kum 20 mi Paraguayan swimmer hian tunhnai khan radio show Aire de Todos hnenah Brazil captain hlui chu a fan hraw tak a nih thu hrilhin, a piahlam zel erawh a sawi tha duh bik lo a, “Message min rawn thawn a, chu zawng chu a ni deuh mai. Ka request form-ah chhanlet turin a la awm a, he hmun atang hi chuan a piah lam zel ka hrilh thei lo che u,” a ti niin an tarlang.
Olympic Games Village atanga hnawhchhuah a nih chungchangah Alonso hian khawi hmun atang maha hnawhchhuah a tawh loh thu sawi bawkin, mipuite chu information dik lo thehdarh lo turin a ngen nghal.
Al Hilal forward Neymar hi khup hliam serious tak atanga a la dam fel loh avangin a club tan Saudi Pro League season thar bul a tan ve thei dawn lo tih karliamta khan Al Hilal coach Jorge Jesus chuan pre-season training laia amah bawrtu reporter rualho hmaah a sawi.
Brazilian attacker hian nikum October thla daih tawh khan hliam a tuar a, season liamta pumpui tih theih deuh thaw kha a chechhuak hlei thei lo a, tunthla tir lam khan a tel loin Al Hilal chuan league title an hlawhchhuak a, Saudi league title la hnember an nihna belhchhahin an vawi 19 champion-na a ni tawh nghe nghe.
Saudi league season thar hi an kaldan phungah August thlaa tan thin niin, Barcelona and PSG star hlui hi engtia rei nge a la bawksawp dawn tih tarlan tel a ni lo.
Nikum October thla World Cup qualifier-a Uruguay laka sihnih faia Brazil tlawm tum khan kum 32-a upa ni ve tawh Neymar hi lehlawm pawl player nen an insutna lamah mittui tla chunga zawnchhuah niin, November thlaah a khup hliam chu zai niin, a club thar tan pawh season bul a tan thei dawn ta lo a ni.
Kum 2023 khan Neymar hian PSG chhuahsanin Al Hilal a zawm a, khawvel huap footballer lar zinga sum s
Saudi Arabia ramah hian season khata euro maktaduai 100 tehreng hlawh tura contract ziak a ni a, a chhuahtirtu PSG pawhin heti zat sum hi Arab mihausaho hnen atangin an fanghma no ei ve bawk!