SEBI chief lakah Congress ten JPC chhui phut bur

Congress te chuan Thawhtanni (August 12, 2024) khan Modi sorkar chu Hindenburg Research tena SEBI chairperson Madhabi Buch chu ‘Adani money siphoning scandal’ ah a inhnamhnawih tia a puh chungchangah na taka beiin he mi chung chang hi JPC chhui chian an phut thu sawiin ‘Modani Megascam ah hian mahni ngeiin non-biological PM inti leh perfectly biological businessman te an inrawlh a ni’ an ti.
Congress general secretary Jairam Ramesh chuan SEBI chairperson Madhabi Buch chu a bang ngei tur a ni tia sawiin Supreme Court pawh Adani probe chu CBI emaw Special Investigation team te hnenah pe turin a ngen bawk a.
Congress senior leader chuan February 14, 2023 khan SEBI chairperson hnenah SEBI chu India financial market steward a nihna anga Indians crores tel te tana tha ber tura thawk tura ngenna lehkha a ziah thu sawiin mahse tun thlengin chhanletna a dawng lo a ti bawk.
A hma lawkin SEBI te chuan insawifiahna an siamah Adani group te chu an chhui chian reng thu sawiin chairperson Madhabi Buch chuan engkim pholangin thil tam takah a lan tel theihna awm thei angah te inhnamhnawih loh a thlang an ti a.
Ramesh chuan thuchhuah a siamah Securities and Exchange Board of India (SEBI) tena Adani Group te financial transaction an chhuinaah hian chak lutuka thil kalpui anga inlantir an tum tia sawiin summons 100, letters leh emails 1,100 leh document 300 a vaia phek 12,000 chuang an enfiah tawh thu an sawi a ti a. “A hautak turu dawn lutuk a, mahse, an tum ber zawk chu issue pawimawh lak pen zawk a ni. Activities ni lovin action zawk a ni pawimawh ni,” tiin a sawi.
“March 3, 2023 khan Supreme Court chuan SEBI chu thla hnih chhung ngeia Adani Group tena stock manipulation leh accounting fraud an kalpui nia puhna chu chhui zo turin a ti a. Tunah thla 18 a ni tawh a, SEBI te chuan critical investigation, minimum public shareholding kaihhnawih Rule 19A chu Adani ten an bawhchhia em tih te chu an la chhui zo fel lo an ti si a ni” tiin Ramesh chuan a sawi bawk a.
Ramesh chuan SEBI te hian investigation an neih 24 zinga pahnih chu kum khat chuang hnuah pawh an chhui fel thei lo a ti bawk a. “Tihkhawtlai luih ni ngeia lang hmang hian PM chuan Lok Sabha inthlanah a close friend te a puih dan sawi ngai miah lovin a paltlang vek a ni” a ti bawk.
“Adani Group ten fihlim veka an insawi chungin, SEBI chuan Adani company thahnem tak te lakah show-cause notice a pe tia sawi a ni bawk a. Mahse, investigation neih a muang em a, Prime Minister’s investigative agencies tena Opposition leader te laka a chet dan rang lutuk hi chu sawifiah theih loh a ni. Tun hnaiah Adani Megascam chhuinaah SEBI integrity leh chetdanah zawhna a tam hle a ni,” tiin Ramesh chuan a sawi bawk.

JPC din loh chuan ram puma lungawilohna lantir
Congress-te chuan SEBI chairperson Madhabi Buch kaihhnawiha JPC (Joint Parliamentary Committee) din a nih loh chuan ram pum huapa lungawilohna lantir an tum thu an sawi nghal a.
AICC general secretary (Organisation), K.C. Venugopal chuan thil serious tak mai a ni tia sawiin Prime Minister chu Adani thlawpah a puh bawk a. “He thila Prime Minister in ngawih a chuh tlat hi a laka rinna nghahna tichhetu tur a ni” tiin Venugopal chuan a sawi bawk.
Union Government chuan issue pawimawh tak te laka mipui rilru lakpen nan chetlakna an neihah Enforcement Directorate te chu Lok Sabha Leader of Oppsition Rahul Gandhi chhui tir lui zui zelah a puh bawk.
“Rahul Gandhi hi ED notice hmangin vau tawh suh u. Hetianga diversionary tactic hi na takin kan dodal a ni” tiin Alappuzha MP chuan a sawi.
Pathianni khan Rahul Gandhi chuan Hindenburg report thar bera Securities and Exchange Board of India (SEBI) chief Madhabi Puri Buch hming lan chungchangah Joint Parliamentary Committee (JPC) inquiry a ngiat thu a lo sawi tawh a. BJP te erawh chuan hnawl nghalin Congress ‘dynasty’ chuan India hmasawnna tihthuanawp antum a ni an ti ve thung.