MUP Centre sak a ni dawn

Zemabawk Middle School Venga Mizoram Upa Pawl Multi-Service Centre sakna tur lungphum chu Thawhtanni khan Social Welfare & Tribal Affairs minister Lalrinpuii’n a phum a. Social Welfare & Tribal Affairs director Dr Lalhriatzuali Ralte chuan a tawiawm.
Minister chuan MUP member-te chu Mizo mipui timawitu leh zahawma siamtu an ni, tiin, sawrkar laipuiin kum upate a ngaihpawimawh thu leh hamthatna hrang hrang a siam sak thu a sawi. District tinah tar enkawlna in – Old Age Home siam tum a ni tih a sawi a. MUP Multi-Service Centre sak mek kiangah Old Age Home din tura ruhman a ni tih a sawi a ni.
Social Welfare & Tribal Affairs director pawhin MUP Gen. Hqrs. leh Zemabawk khawtlang hruaitute hmalaknaa MUP Multi-Service Centre sakna tur lungphum phum fel a ni chu a lawmpui tih a sawi a. He Centre hi sawrkar laipui Ministry of Tribal Affairs hnuaia Article 275 kaltlanga ruahman niin, hemi hnuaiah hian tribal-te hamthatna tur scheme hrang hrang pawh thawh thin a ni tih a sawi.
MUP Multi-Service Centre Zemabawk hi sawrkar laipui Ministry of Tribal Affairs hnuaia Article 275 sum cheng nuai 290 senga sak tura ruahman niin, hemi atang hian 2023-2024 sawrkar kumah khan cheng nuai 100 hmuh a ni tawh.