Zeekr te EV battery charge chak ber

Chinese car maker Zeekr te chuan electric vehicle (EV) battery charge chak ber an siam chhuah thu sawiin an battery te chu industry leader Tesla leh BYD te battery ai pawhin a charge chak zawk tiin an sawi.
Zeekr te chuan an battery te chu minuet 10 leh a chanve chhung lekin an ultra-fast charging stations-ah 10% atangin 80% a charge nghal thei tiin an sawi.
Chutih laiin Elon Musk’s Tesla te Model 3 battery te chuan 15 minutes charge nan hun an hmang thung a, chutah pawh battery a chanve chauh charge hman thungin battery hian 175 miles (282 km) a daih thung.
Kar leh atanga lei theiha awm tur Zeekr 2025 007 Sedan chu he battery thar hmang hmasa ber tur a ni.
Battery te chu khawvawtah pawh a tha hle tia sawiin darkar chanve pawh tling lovah -100C temperature ah pawh 10% atangin 80% a charge hman tiin company-te chuan an sawi bawk.
Consultancy firm Sino Auto Insight founder leh managing director ni bawk Tu Le chuan, “Tesla charging technology hi industry hmahruaitu a nih lohna a rei tawh. Zeekr te thusawi hi a awihawm a, tichung chuan EV battery charge chak ber a ni chuang lo, chak ber zinga pakhat a ni hrim hrim hi hmasawnna nasa tak a ni” tiin a sawi.
“China atanga inelna hi a turu hle mai a, BYD brand te chuan scale leh sales an thlurbing laiin Zeekr, Li (Auto) leh Ninop te chuan charging experience lam an thlurbing a ni” tiin Mark Rainford, China-based car industry commentator chuan a sawi a.
“Zeekr parent company Geely hi integrated business thang zel niin hmasawn zel turin resource an nei tha bawk si a ni” tiin a sawi bawk.
Geely te hian brand hrang hrang neitu nihna neiin chung zingah chuan UK-based luxury sports car brand Lotus leh Sweden’s Volvo te pawh an tel.
May thla khan Zeekr chuan New York Stock Exchange-ah share trading an tan a, kum 2021 hnua Chinese company lian US market lut leh hmasa ber a ni.