Policy Coordination Committee…

India Independence Day vawi 78-na lawmna nimina Aizawl Lammuala neiha Chief Minister Pu Lalduhoma thusawiah, sorkar thar a pian hnua hmalakna leh hlawhtlinna langsar deuhte bakah hmathlirte tarlan a ni a. Thla riat (ni 248) chhunga sawrkar hma lak tawhna leh hna a thawhte hi a fakawm viau mai.
Hun rei lote chhunga sawrkarin hna a lo thawh tawh tarlante hi sawi zui chakawm tak tak a ni a; amaherawh chu, hmunin a daih dawn loh avangin, Chief Minister’s 100 Days Programme tihhlawhtlin zinga ‘Mizoram State Policy Coordination Committee’ din chungchang hi thil pawimawh tak, Mizoramin kan mamawh em em tur a nih avangin tawitein luhchilh ila.
He committee hi, sorkar department hrang hrangte chak zawka hna an thawh theihna tur leh an hmalakna hrang hrang thlunzawm theih dan tur enzui tura din a ni a. Tun dinhmunah chuan, zau taka hna han thawh vakna hun a la awm hman chiah lo maithei; mahse, an hmalakna tur hi Mizoram hmasawn dawrh theihna tur a nih avangin a pawimawh hle a ni.
Sawrkar hnuaia department hrang hrangte hi ram inrelbawlna atana pawimawh tak tak vek, a pawimawh avanga department-a din vek a ni a. Chutih rualin, department dang nena inpeizawn remchang bik an awm thlih thliah a, chung zinga pakhat, entirna atana hman remchang tak chu, AH&Vety leh agriculture/horticulture department te hi an ni awm e.
Kan hriat angin Mizorama ran chaw siamna hmunpui ber AH&Vety enkawl ‘Animal Feed Plants’ chu Ramrikawnah a awm a. Ran chaw siamnaah hian a chawhpawlh (ingredient) pui ber chu Vaimim (60%) a ni. Mahse, Vaimim hi state pawn atangin, (a chang chuan Myanmar atang te pawhin) kan chaw lut a. Kum khat chhungin cheng vaibelchhe tel state pawnah kan vawm chhuak a ni. Vaimim hi Mizoram leilung atanga hlawk taka tharchhuah theih a ni. Vaimim tharchhuahna tura hma latu tur chu agri/horti department an awm a, heng department te leh AH&Vety department te hian coordination tha tak siamin, contract farming hmangin emaw thawhhona siam thei se, kuthnathawktu tam tak eizawnna siamna a nih dawn bakah, state pawna chhuak tur sum tam tak, state chhungah a vir vel theih phah dawn a ni. Hei hi entirna pakhat a ni mai a, thil dang dangah pawh inthlunzawmna neihna tur a tam awm e.
Chutiang zelin, PHE, P&E leh PWD te pawh hian, hmasawnna hna an thawhna lama department dang hmasawnna lo awmsa inlaihchhiatsak vak vak lo zawnga developmental works kalpui turin rem han ruat tlang se, engineer rual an ni bawk a, rem an hre em em ang. Department dang dangah pawh hetianga inhne rem leh inthlunzawm chunga sawt leh hlawk zawka thawh dunna emaw thawhhona emaw siamna tur a tamin a rinawm.
Hengte hi ‘Mizoram State Policy Coordination Committee’ in an khawih tur a nih a rinawm a, an mawhphurhna hi a pawimawh hle a ni.