Vinesh tan silver beiseina a tawp fel ta!

Vinesh tan silver beiseina a tawp fel ta!
Paris Olympic Games 2024 laia a hmuna thubuai awm thei ngaihtuah tura din Court of Arbitration for Sport (CAS) hnuaia ad-hoc division chuan Nilaini khan women’s 50kg freestyle final bout khel hman lo chiaha an hnawhchhuah (disqualified) tak Indian wrestler Vinesh Phogat-i’n semi-final lama chiang zeta a hneh hnu Cuban wrestler Yusneylys Guzman Lopez-i nena silver medal indawmtawm a dilna a hnawlsak.
Tarlan tawh thin angin, kum 29 mi Vinesh hian Cuban lakah 5-0 hnehna changin final lut mah se final bout khelh hmaa a rih zawng an endiknawnnaah inbuknaah gram 100-in kg 50 a pel tih hmuhchhuah a ni a, intihsiak kal lai atanga hnawhchhuah niin, mittui nen Games a chhuahsan a, wrestling khel chhunzawm thei tura chakna a neih tawh loh thu sawi chungin wrestling a chawlhsan thu a puang zui ta bawk.
Semi-final bout-a chiang zeta a hneh hnu kha final khel thei tura hlankai niin, American wrestler Sarah Hildebrandt chuan Vinesh aia nep zawk 3-0-a hnehin gold medal a awrh a; Lopez laka an chak dan ve ve atanga tehin Phogat kha hnawhchhuah ni ta lo se, final-ah khan Indian leh American intum ta se Hildebrandt lakah Vinesh kha a chak theih mai rinna a piang lo thei lo!
India nula tana rilru nat kumkhuana ni tawh turin freestyle 50kg huanga khel thei tur chin rihzawng bituk aia gram 100 leka a lo rih palh avangin gold-medal bout khel hman loin hnawhchhuah a ni a, a rilru na leh a rihna tihniam tura a beihna kawnga a chauh deuh avangin Games Village chhunga polyclinic-ah a mu ren rawn hman nghe nghe!
Final khel thei loa danbeh ni mah se Vinesh chuan CAS ad-hoc division hnenah Olympic silver medal tal chu indawmtawm a dil a, he mi chungchanga thutlukna chuan India mipui a tihnual rawih a, Indian Olympic Association (IOA) lamin na takin an chhanglek nghal.
Vinesh Phogat-i thubuai thehluh chungchanga thutlukna an tarchhuah theih hun hnuhnung (deadline) atan vawiin, August ni 16 hi ruat mah se nimin khan CAS chuan thutlukna an puang thei ta a, “Court of Arbitration for Sports Ad-Hoc division chuan August ni 7, 2024-a Vinesh Phogat dilna thehluh chu a hnawl,” tiin.
Tarlan tak angin, appeal a thehluhah Vinesh khan final khelh phalsak a dil lo a, semi-final bout-a a hneh hnu Cuban wrestler Yusneylis Guzman Lopez nena silver medal indawmtawm a dil a, mahse, a Olympic beiseina hnuhnung chu a thamral ta a ni.
Phogat hi a khelh thinna pangngai women’s 53kg huangah chuan Rio 2016 leh Tokyo 2020-ahte khan medal arh pha tur khawpin a thlengsang zo lo a, hliamin a tihbuai vangte pawh a ni thei bawk ang a; kumin khan Indian wrestling chuan a chungchangah ruahmanna thar siamin a rihna an tihhniamtir a, Olympics-a vawithum a telnaah kg 50 huangah inlanin, a chhe berah pawh silver medal awrh thei turin semi-final a paltlang a, mahse, a rihna a lo hlamchhiah deuh nge gram 100-in 50kg freestyle huanga khelh theihna a pel a, biangah mittui a luang zui ta a ni!
IOA President PT Usha chuan wrestler-in a rihna a thunun zo lo chu midang mawhpuh tur awm loin wrestler mawh liau liau a nih thu lo sawi tawh mah se Phogat-i khinletna hnawlsak a nih hnuah CAS thutlukna chu na taka sawiselin, thutlukan dengkhawng leh lungchhiatthlak tiin a sawi.
IOA thuchhuah chuan United World Wrestling (UWW) dan siam pawh sawiselin, athlete-te’n taksa leh rilru lama harsatna (stress) an tawh thin avanga an duh anga an inthunun tawk theihlohna pawh hriatthiampuina chhete nei loa dan khauh tak zamah an puh.
Vinesh-i ‘appeal’ hnawl a nih takah chuan Paris Olympics-a India medal lak chu parukah a ding tlang dawn ta a ni.
Haryana wrestler Phogat khan Olympic-a vawithum a inlanna Paris 2024 semi-final bout a khelh hma zan khan a weight limit pel lo turin theihtawp chu a chhuah ve a, a sam a tan a, a kaah chaw leh tui a lut lo a, zankhuain a rihna tihniam turin chet a thawh a, mahse, zinga inbuk a hmachhawnah gram 100-in ramri a pel zui ta tho a, hnawhchhuah a tawk zui ta a ni.
National Wrestling coach Virendra Dahiya chuan CAS thutlukna a hriat rualin Vinesh Phogat khan a lo berah pawh silver medal dawn a phu tih sawichhuak, “Wrestling Federation of India (WFI), Sports Ministry leh Sports Authority of India (SAI) chuan kan tana tha tur zawnga thutlukna a rawn chhuah kan beisei vek a, mahse, vanduaithlaktakin, kan beiseina a thamral ta a, a lo berah pawh silver dawn kha a phu hliah hliah avangin kan lungngai takzet a ni,” a ti.