Hockey India-in No 16 thukruin Sreejesh zahna lantir

India mipa hockey team-a an goalkeeper ropui ni rei tak PR Sreejesh chuan Paris Games-a India tana Olympic bronze medal a humhimpui hnuah ram tana inkhelh a bansan thu a puang a, Hockey India chuan nimin, Nilaini khan Sreejesh zahna leh chawimawina lantirna’n a jersey number hak thin (No. 16) chu midang reng reng nena sawizawm a nih tawh lohna’n an dahbo (retire) tih an puang.
Hockey India secretary general Bhola Nath Singh chuan he thu hi tarchhuakin, kum 36-a upa Sreejesh-a’n kum 20 dawn a lo larpui tawh No. 16 jersey chu midang tana rochun a rem dawn tawh loh thu a nemnghet a, junior national coach atan an senglut zui nghal tih a tarlang tel.
Thlahna leh chawimawina hunah Singh chuan thu sawiin, “Sreejesh hi junior team coach thar a ni tawh dawn a, senior team-a a No. 16 jersey hak thin pawh midang hak chhuah ve ngai tawh loh tura thulkhung a ni. Junior team lamah erawh No. 16 hi an ha zui zel thung ang.
“Sreejesh hian amah ang bawka No.16 jersey ha chunga parchhuak tur junior team atang hian a chherchhuak ngei ang.”