India education system tha mamawh ti

India chuan hnathawk tlak leh theia siam turin a education system chu tha leh quality zawkin siam a ngai a, institution tha tak leh judiciary tha tak hmangin hmasawnna kalpui zel turin hma lain developed ram ni turin land leh labour market a reform a ngai tiin International Monetary Fund deputy managing director Gita Gopinath chuan a sawi.
Delhi School of Economics’s diamond jubilee conference a Fifeenth Finance Commission chief N.K. Singh nena titi dunna an neihah hmeichhia hnathawk thei an tam lo a nih chuan eng ram mahin ‘high-income’ status a nei thei lo tia sawiin India chu women’s labour force lamah 35% ni mek chauhin hmeichhiate himna chu tihmakmawh a ni a ti bawk.
India import tariff chu a sang lawrlak tia sawi bawkin Gopinath chuan sumdawnna lama inhawn chu pawimawh tawp a ni a ti bawk a, trade integration in sawisel hlawh mahse a pawimawh tho a ti bawk a. India-in world stage leh global supply chain a awmze nei nih a duh chuan tariff a tihhniam a ngai a ti bawk.
Kum 2010 atang khan pandemic len thlengin India GDP chu 6.6% vel niin employment growth chu 2% hnuai hret a ni tiin IMF official chuan a sawi bawk a. “G20 ram dangte nena khaikhin ralah chuan India growth chu employment-driven bikah a hniam zawk a, capital lamah a sang zawk” tiin a sawi bawk a.
Tun leh kum 2030 inkar chhungin India chuan hna 60 million atanga 148 million a siam belh hman a ngai tia sawi bawkin chumi tur chuan policy tha leh mumal bakah Parliament-in a pawmpui tawh Labour Codes te hman a ngai a ti bawk a.
India rama workforce general quality leh skill level chungchangah Gopinath chuan workforce a skill mamawh tawk awm lo chu harsatna siamtu a ni tia sawiin chuvang chuan education tihhmasawn a ngai a, hun lo la kal turah hnathawk tlak chhuah ngaiin chumi tur chuan education quality tha a pawimawh a ti bawk a.
“Tun tut tutah a result a lang nghal lo vang a, hun a duh deuh ang a, mahse, chu tak chu tuna kan siamthat ngai chu a ni. A nih loh chuan hnathawk rual skill chuang si lo kan nei teuh mai ang” tia sawiin, ‘corporate investment leh private investment pawh tihpun a ngai’ tiin a sawi bawk.
“Public investment pawh a tha khat a. Private investment in en pawhin real estate a household investment pawh a sang thawkhat a ni. Mahse, corporate investment in en chuan economy7% vela thang tura hisapah chuan a tha tawk lo hle a ni” tiin Gopinath chuan a sawi bawk.
Automation leh Artificial Intelligence (AI) sang zual zelah hun lo la kal turah work opportunities-ah hlauhthawnna a awm karah IMF economist chuan multilateral body tena ram 170 laiah tehna pali hmanga AI chungchanga zirchianna an neih thu a sawi a.
“India hi AI kaihhnawiha a inpuahchahnaah intermediate level vel niin chu chu emerging economies leh developing economies te lakah pawh above average a ni a. Mahse, heng tehna hrang hrang te hi bihchian chuan education leh skill level chu dah pawimawh a ni a, hei tak hi ngaih pawimawh ni se tih tur tam tak a la awm a ni” a ti bawk.
Sorkar policy-te chuan automation awnin policy a siam mai tur a ni lova, social security net leh reskill thei turin hmalak zawk tur a ni a, tichuan hnathawk ten hna an thlak dawn pawhin unemployment insurance an hna hmuhhma an nei thei tur a ni, a ti bawk.
India-in developed ram nih a tumna chungchangah Gopinath chuan zan khat thil thua thleng thei a ni lo va, kawng hrang hrangin area tinah hmalak ngai a ni a ti bawk a.
“Growth rate thuah India-in a ti tha viau a. Economy 7% a thangin major economy zinga thang chak ber a ni a. Zawhna pawimawh ta chu – engtiang nge economy chu thantir reng a nih ang tih niin tichuan per capita income sang chu advanced economy te nen intluktlanga awm theih a nihna tura hmalak chu a ni” a ti a.
“Formal education bik i en chuan entir nan India chu G20 ram dang te aiin a hniam zawk a ni. Investment lamah pawh sorkarin nasa takin hma a la chungin mamawh leh ram dinhmun ngaihtuahin tihtur tam tak a la awm a ni,” a ti bawk a.
“Pathumnaah chuan development a awm theih nana institution pawimawh mamawh te neih a ni. Sumdawnna tihawlsam kawngah regulatory environment tha, judicial system tha te an pawimawh” tiin Gita Gopinath chuan a sawi bawk.