Kum 40 chhungin tihdik loh ka nei lo ti

Karnataka Chief Minister Siddaramaih chuan Mysuru Urban Development Authority tena ram an then leh sem darh chungchangah thil fel lo awm tia sawiah hek leh khin remtihna a tawn mek leh BJP tena bang tura an nawrnaah kum sawm li chuang politics a khelh chhungin engmah tihsual a nei lo tiin a sawi.
Senior Congress leader chuan Chief Minister leh Minister pawh a political career chhunga a nih tawh thu sawiin chungah chuan ‘mimal hlawk nan a thiltihtheihna a hmang sual ngai lo’ a ti a. BJP te nawrna chu hnawlin, “Politics ah chuan party dodaltu an awm ang chu, lungawilohna lantir teh se, tihsual ka nei lo” a ti bawk a.
“Judicial system-ah rinna ka nghat a, petition kan thehlut tawh a, hearing neih mai tur a ni dawn a. Interim relief pek niin Governor in prosecution sanction a tihchhuah hi hnawlin a awm ang,” tiin a sawi.
Chief Minister chuan Thawhtanni zing lam khan Governor thutlukna khinna chu Karnataka High Court-ah a thehlut a ni.
Kar kalta Inrinni khan Siddaramaiah chuan Governor-in amah khin theihna a tihchhuah chu ‘anti-Constitution’ tih leh ‘dan kalh’ tia sawiin, ‘Court ah zawhna zawh a ni ang a. Bang turin tihsual ka nei lo’ tiin a sawi bawk.
Kar kalta tawp lam khan Karnataka Governor Thaawar Chand Gehlot chuan Chief Minster chu Mysuru Urban Development Authority or MUDA kaihhnawiha corruption charge awmah thubuai siamsak theihna leh chhui theihna thupek a pek avangin inhnialna nasa tak a siam a ni.
Govenor erawhin thutlukna a siamna chhan sawiin ‘neutral, objective leh thleibik nei lo chhuichianna kalpui a nih theih nan’ tia sawiin a lan danah Siddaraimah laka puhna te ah thil fel lo awm ngeia a hriat thu a sawi a ni.

Congress ten sawisel
Governor thutlukna siam chuan Congress te tithinrim hle thungin state pumah lungawilohna an lantir nghal thung a. Chief Minister pawhin Governor chu sawiselin BJP te ‘uite’ a ti bawk a. Siddaramaiah deputy DK Shivakumar pawhin Governor thutlukna siam chu ‘muder of democracy’ tiin a sawi bawk.
Governor chuan Chief Minister hnena sanction prosecution a pekah eng vangin nge a lakah investigation tih a nih lohna chhan tur sawifiah tura tiin ni sarih chhunga chhanna pe turin a ti a ni.
State sorkar chuan Governor notice pek chu ‘Constitutional office nasa taka hmansualna’ tiin an sawi thung.
Siddaramaiah chuan amah bang tura an nawrna chu chhangin, “Eng vangin nge ka ban ang min hrilh teh u? Ka ngaihdan chuan Governor hi bang zawk tur a ni, a chhan chu Government of India uite angin a awm a ni” tiin a sawi.
BJP te chuan Soiddaramaiah chuan a chung chang tha taka chhui a nih theihna turin Chief Minister lal thutthleng chu a kalsan tur a ni tiin an nawr ve thung.

MUDA Land Scam Case
MUDA scam hi Chief Minister nupui Parvathi ram Myusuru upmarket area a infra development atana ram lak compensation kaihhnawih a ni a. He ram hlut lam hi Rs 4,000 atanga Rs 5,000 crore vel lai hu nia sawi a ni a.
Activist TJ Abraham an compalaint a siamah Chief Minister, a nupui leh a fapa te bakah senior MUDA official te chuan Mysuru-ah dan kalhian hmun 14 allotment siamin hei vang hian sorkar chuan Rs 45 crore a hloh phah a ti bawk a.
Siddaramaiah chuan ram chu a nupui unaupa in kum 1998 khan a pek a ni a ti ve thung a. Mahse, activist dang Snehmayi Krihna thung chuan a nupuia unaupa chuan dan kalha neiin sorkar official te puihnain document lem hmangin a register a ti ve thung.