Inkhelh laia mual sira zun vangin football player an hnawtchhuak

Peru rama football match pakhatah Atletico Awajun striker Sebastian Munoz chu khelmual sirah a zung a, video-in an lo la fuh a, referee-in a hmuh hnuah a hnawtchhuak nghal.
Copa Peru match-a Awajun player Munoz-a zun hun hi corner pet tura khelmual kil a pan lai niin, hetih lai hian lehlam pawl goalkeeper chu physio lamin a hliam an buaipui mek a, he hun awlah hian Sebastian Munoz chuan camera hnungchhawn zawngin khelmual sira entu mipui thut lohna lai zawnah zunram a thiar ta mai a, referee-in hmu lo mah se video-a a zung lai lo lang chu Cantorcillo FC player-te’n phur takin referee an kaw hhmuh a, corner pawh chhuih hman ta lo chuan red card hmanga hnawhchhuah a ni.
He thu buatsaih lai thleng hian Peruvian football official-te leh Atletico Awajun chuan Munoz-a zunga puhna chungchangah hian vantlang hriatah sawi an la nei lo.
Sebastian Munoz-a khelhna Atletico Awajun hi Peru rama an third division club niin, Copa Peru play-offs an khelh tumin an player hian chhan dangdai tak avangin hnawhchhuah a tawk ta a ni.