Taylor Swift-i’n Michael Jackson Wembley Stadium record a khum

Taylor Swift chu London stadium hmingthang Wembley stadium-ah solo artist zinga tum khat tour a concert vawi riat nei thei hmasa ber niin, Michael Jackson record khumin record thar a siam. Swift ‘Eras Tour’ hian record a siam hnem ta malh malh khawp mai.
Taylor Swift hian a Eras Tour neih mekah Europe a chhuahsan hmaa show hnuhnung neih nan Wembley Stadium hi a hmang a, Eras Tour hi North America-a bul tanin, South America a hrut zuai a, chutah Asia leh Australia te kal lehin, Europe a lut a, Wembley Stadium, London chu Europe-a a show neih hmasakna niin, zan thum a concert a, ram hrang hranga a kual leh hnuah European leg khar nan Wembley-ah bawk zan nga a concert leh ta a ni.
Swift chuan a Wembley zan tawp berah mipui hnenah lawmthu sawiin, “Solo artist zinga tum khat tour a Wembley-a tum riat play thei hmasa berah min siam ta a nih hi. Kan lawm thu hi sawi ngaihna pawh a awm lo,” a ti.
A hmaa he record siamtu chu Michael Jackson niin, 1988-a Bad Tour a neihah Wembley Stadium-ah hian tum sarih a concert a, hei hi Swift hian a rawn khum ta a ni. Solo artist chauh ni loah chuan pop group Take That pawhin 2011-a Progress Tour an neih khan Wembley Stadium-ah hian zan riat show an lo nei ve tawh bawk.
Eras Tour-ah hian Taylor Swift hian khawpui hrang hrang a tlawhah zan thum vel zel show a nei thin a, London hi a show neih hnemna ber niin, zan riat lai show a nei ta bik a ni.
Eras Tour hi thla hnih an chawl ang a, chumi hnuah North America-ah chhunzawm leh dawn a, October ni 18-ah Miami-ah North American leg vawi hnihna an tan leh dawn a ni.