Thingtlang khaw hausa

Tun hnaia chanchinthar luahtu pakhat chu Gujarat state, Kachchh district-a thingtlang khua, a hming Madhapur a ni. India ram mai ni lo, Asia khawmualpuia thingtlang khaw hausa bera sawi a ni. He khuaah hian mihring 32,000 vel an cheng a, an hausakna chu cheng vaibelchhe 7,000 a tling.
Thingtlang khua mai mah ni se, India rama bank lian 17 zet an inbun a, la inbun ve lo bank dangte pawhin branch thar hawn an tum mek bawk.
He thingtlang khua hian rangkachak khur emaw, lunghlu khur emaw, leilung hausakna engemaw ‘special’ tak an nei a ni hran lo a, leilung chhungril lam emaw, leilung pawnlang chunglama to chi thlai tha duh deuh emaw an nei pawh a ni hran lo, an hausakna hnar hi anmahni a mihringa te zawk an ni.
|halai hnathawk thei chin chu ram dangah an feh chhuak a, in saknaah te inhlawhin an thawhchhuah sumte chu an awmna ramah dahkhawl mai lovin in lama an chhungte an rawn thawn a, bank-ah an lo deposit a, chutiang tlingkhawm chu vbch 7,000 a lo tling ta a ni. Hnathawktute hi Central Africa-ah an tam ber a, hei bakah hian UK, USA, Australia leh New Zealand-ah te pawh an inzarpharh bawk.
Madhapur hausakna chhiarkawp:
A lu nungin mihring 32,000 an awm a, nausen pianghlim te nen vek chawhrualin, mi pakhat thawhchhuah hlutzawng chu cheng nuai 21.875 ang a ni a. Kum tling lo naupang kum 10 chin hi 20% angah chhut ila, kum 10 chin chunglam mi pakhatin a thawhchhuah zat tur chu chawhrualin cheng nuai 27.34 tihna a ni a. He khuaah hian chenna in 20,000 awm anga sawi a ni a, chhungkaw tin income tur chu chawhrualin cheng nuai 35 tihna a ni bawk.
Kerala-ah khuan coconut a tam hle a, tlawm viau awm tak a ni a, mahse a tlawm thei tlat lo; a chhan chu coconut lo tur an inhmu mang lo a, coconut lawh man a to avangin coconut man a tlawm thei lo; a chhan chu ram dangah thalaite inhlawhin an chhuak nasa.
Mizoramah pawh hian sawrkar apiangin flagship programme kalpuiin thalai hnathawh tur nei lote eizawnna tur an buatsaih thin, mahse a hlawhtlinna hmuh tur a la awm rih lo; kan kalpui dan a la dik tawk lo tihna a nih rualin, kan beih nasat tawh dan enin kan chemkalna tur a ni lo a ni ang. Hnathawh tur inkawhhmuh aiin, hnathawktu lam chher hriam hi kan chemkalna tur zawkte pawh a lo ni mahna.
Chuvangin, human resource development/skill development lam uar takin kalpui ila, chu chu kan thatpui a rinawm viau a ni.