Aizawlah ram pass mumal awm lo – Lalthansanga, minister

Aizawl khawpui chhungah ram pass mumal a awm loa, a luahtuten nakin zela harsatna an tawh loh nan chinfel ngai thahnem tak a awm tih minister Lalthansanga chuan a sawi.
Inrinnia Falkland Veng Vengpui Road siam thar a hawnnaah bialtu MLA ni bawk Lalthansanga chuan, Aizawl khawpui chhung ngeiah ram pass mumal awm lo, a luahtuten nakin zela harsatna an tawh loh nan, chinfel ngai thahnem tak a awm tih a sawi a. Hemi chungchangah hian sawrkar chuan hma lak a tum tih a sawi. Hmasawnna hna chak zawka kalpui tur chuan dikna leh rinawmna vawnnun a pawimawh, tiin, hmasawnna hna hrang hrang kalpuina endiktu dik tak chu khawtlang mipui an ni tih a sawi a. Hmalakna hrang hrang chu vilpui thin turin a chah.
Report-a tarlan danin, Falkland Vengpui Road hi Falkland East lam pawhpheina tur kawng a ni a. Scheme for Financial Asistance to States for Capital Investment (SASCI) atanga Rs. 480000 vel leh khawtlang thawhkhawm Rs. 477600 hmanga siam a ni. Bialtu MLA ni lai hian cheng nuai 1 a thawh ve bawk.