BCM-in MPF-a tel ve ngaihtuah dawn

Baptist Church of Mizoram Assembly hnuaia rorelna sang ber, Assembly Executive Committee thukhawm chuan Mizoram People Forum (MPF) a tel ve chungchang Assembly-a thlen a remti.
BCM president Rev. F. Ramdinmawia kaihhruai Assembly Executive Committee thutkhawmah hian Assembly 2024 rorel-in Mizoram People Forum (MPF) a tel ve tura sawmna ngaihtuahin, la zirchian leh phawt nise, tia thu a dah chu bawhzuia hma la tura ruatten an hmalakna an report thlir a ni a. MPF leh a thawhpui kohhran pawl hrang hrang rawna an zirchianna atang leh, Council of Churches in Mizoram-a thawkho tura ruahmnna kal mek thlirin BCM tel ve hi a rem lohna a awm loin a hria a, Assembly 2025 ah MPF-a tel rawtna hi thlen chhoh remtih a ni.
Hei bakah hian Finance and Pension Committee-in Education Department salary budget-a dah turin Rs. 287,30,000 dah belh a dilna remtih a ni a. Object head-ah honorarium budget dah belh remtiin, budget head-a Relief to Church head chu Building Relief tia thlak rawtna pawm a ni bawk.
BCM general secretary Rev.R.Lalbiakliana report danin, kum 2023- 2024 BCM main account closing balance atangin Rs. 4,36,70,000 chu kum kal lai 2024 -2025 a hman tura ruahman a ni a. Council of Churches in Mizoram din tura hmalakna kal zelah kumin October 26-ah hawnna inkhawm neih tum a ni. Kristian Hlabu ennawn hna kal mekah BCM aiawh leh Synod aiawhten ruahmanna siamin hma an la mek a ni.
Assembly thurel bawhzuiin kumin October 4-ah ram pum huap awmni kham tawngtai neih tura ruahman a ni a; BCM Social Concern department hmalakna-in ram pum huapin ruihhlo do beihpui thlak mek a ni. Hemi atan hian baseline survey neiin, tualchhung kohhranah ruihhlo do campaign kalpui a ni a, tleirawl leh nu leh pa zingah hma lak chhoh mek a ni bawk.
Chhawmdawlna hnathawhna lamah, Cyclone Remal avanga chhiatna leh fur ruahtui leh leimin avanga chhiat tawk leh mitthi chhungte chhawmdawl nan BCM R&D department chuan Rs. 17,33,000 a hmang tawh a ni.