Israel leh Hezbollah te inkap
Israel sipaite chuan August 25, 2024 khan Lebanon-a Hezbollah te hmunpui beiin chet an la a, hei hi Iran thlawp Hezbollah ten an bei dawn tih a chian hnuah a hmalakna a ni.
Israel military te chuan missile leh drone hmanga beih an tawh tur thu sawi lawkin air siren te ti riin emergency puan a ni zui nghal bawk.
Tun hnaiah Middle East chu boruak tang tak hnuaiah a awm reng sa tawh a, a chhan ber pawh Hezbollah leh Iran tena Israel-in Beirut khawpuia Hezbollah senior commander a tihlum leh Tehran khawpuia Hamas political leader a tihhlum avanga phuba an lak tur thu an sawi vang a ni.
Israel sipaite chuan thuchhuah an siam zuiah, “Hezbollah te chuan Israeli territory inthenna bul hnai te chu beih tumin chet an la mek a. Dinhmun derthawngah in ding mek a. Hezbollah te nuai bo tur hian hma kan la mek e,” tiin an sawi a.
“Tute pawh Hezbollah chetlak theihna hnaia awm te chu inchhungte nena in him theih nan insaseng turin kan ngen che u a ni,” tiin an sawi bawk.
A hnu lawkah Israeli sipaite chuan thuchhuah siamin Israelis tana hlauhawm Lebanon a Hezbollah te hmun chu indo thlawhna hmanga an beih thu an sawi zui nghal bawk a.
Israeli military thupuangtu Daniel Hagari chuan ‘Hezbollah te chuan rocket te, missile leh UAV te pawh Israel beih nan an hmang thei’ a ti zui nghal bawk a.
“Lebanon chhim lam atangin Hezbollah te chuan Israel beih tumin an inpuahchah mek a, Lebanese civilians te chu dinhmun derthawng takah an dah nghal bawk” tia sawiin civilian te chu insaseng turin a ngen zui nghal bawk a.
“Hezbollah te chetdan hian Lebanon mipui te chu dinhmun derthawngah a dah a, Israeli mipuite pawh dinhmun derthawngah dahin helai region tan buaina nasa zawk thlen thei a ni,” tiin a sawi bawk.
Pathianni tlai lam khan Israeli Prime Minister Benjamin Netanyahu chuan security cabinet meeting a ko nghal a. Israel chuan Ben Gurion International Aiport chu khar zui nghal bawkin mahse a hnu lawkah a hawng zui leh thung a.
Israel leh Hezbollah te hi nikum October 7 a Hamas tena Gaza an run hnu atang khan inkap chamchi an ni a.
Ramri bul hnaia an inbeih rengna chuan buaina nasa zawk a thlen hlauhna a liansa reng a, tun hnaia Hezbollah chief thihna chuan boruak titang zualin Hezbollah te chuan an military commander Fuad Shukr thihnaah phuba lak ngei an intiam zui bawk a ni.
Beirut khawpuia Shukr thah a nih hnu lawk darkar rei lo teah Tehran khawpuiah Hamas political leader Ismail Haniyeh chu tihhlum a ni zui bawk a. Chu chuan Hezbollah leh Iran te chu thinrim taka siamin phuba lak ngei an intiam zui a ni.
Gaza buaina kaihhnawih leh Hezbollah te inhnamhnawihna kalzel bakah Iran leh a proxy ‘Axis of resistance’ te chet zui zelna chuan Middle East ah buaina nasa zawk a chawhchhuah hlauhna a lian hle reng a.
Gaza buaina pawh nikum October 7 atanga intan niin Hamas tena southern Israel beia mi 1,200 chuang nunna la a, mi 500 chuang mitang atana an hruai atanga intan a ni a.
Israel-in a chhan letnaah Gaza-a Palestinian mi 40,334 chuangin nunna an chan phah tawh niin Gaza health ministry te chuan an sawi.
Hezbollah te hi Shia Muslim armed group te niin Lebanon-a inbun an ni a, khawvel huap pawha non-military state ni si ralthuam nei tha ber pawl niin Iran in a thlawp bur te an ni.
Lebanon ah thuk taka inhnamhnawihna neiin kum 1992 atang khan Lebanon national election-ah pawh chuha tel tan tawh an ni bawk a.
Hezbollah leader Sheikh Hassan Nasrallah chuan fighters 100,000 chuang neiah inchhalin mahse a tak takah chuan fighter 20,000 atanga 50,000 vel nei tura ngaih an ni.
Hezbollah te hi khawthlang ram te chuan firfiak pawla an puan niin US leh UK te pawhin terrorist tia an chhal zinga tel an ni.