Barca chakpuitu Lewandowski leh bawk

Barca chakpuitu Lewandowski leh bawk
Season thara Lamine Yamal-a La Liga goal hmasaberin Olympic Stadium-ah Barcelona a chakpui zo lo a, an league bultanna inkhela 2-1-a Valencia an hnehna goal hnih khungtu Robert Lewandowski bawk khan minute 15 la awmah 2-1 veka Athletic Club an hnehna goal pawimawh thawh lehin, head coach thar Hansi Flick-a hnuaia competitive game hnih an khelhah Catalan team an la chak ve ve.
Inrinni zan Estadi Olimpic Lluis Companys-a mipui 46,448 pungkhawm hmaah Spain winger Yamal chuan Euro 2024-a a chetthat chhunzawmin tan atanga minute 24-ah Barcelona hmahruaina goal a khung a; he rawlthar kum 17 mi hian box pawn atangin mikhual goal lamah a chhuih phei vir chawi chawi a, chu ball thlawk chuan Athletic defender Inigo Lekue fuhkawiin he inkhela goal hmasaber a lut.
Chawlhlawk hma minute thum la awmah defender Pau Cubarsi chuan Alex Berenguer titluin penalty a chawi a, Oihan Sancet chuan Marc-Andre ter Stegen-a tluk lohna lama thawnlutin Athletic Club siphurh sutna goal a chhuihlut.
Blaugrana hian an hmahruaina neikir turin goal thun an harsat zui ta tlat a, mahse, inkhel tir lama tum hnih ngawt rem zet atanga goal ban chhuihper Poland striker chuan classic goal tih ngam hmangin chakna goal a hlawhchhuak leh ta a ni.
Barca hian La Liga season bul an tan takah 100% chak vawngnungin, Celta Vigo nen vawihnih khelhah point ruk ve ve hum chungin La Liga standing-ah hma an hruai a; nizan result tarlan hman lohah defending champion Real Madrid chuan Bernabeu-ah Real Valladolid an mikhual ve bawk.
Barcelona hian pound maktaduai 51 zeta contract an ziahpui Dani Olmo an la chhawr thei lo zui zel a; he 26 mi hian RB Leipzig lamah youth level a khel a, Catalan team hian Spanish league squad cost control rules an tih dan avangin Olmo hi an team-ah an la ziaklut thei ta lo a ni.
Hetih lai hian German midfielder Ilkay Gundogan chuan Nou Camp chhuahsanin karliamta mai khan free transfer-in a club hlui Manchester City a zawm fel ve leh tawh thung.
Gundogan hian Spain ramah season tha tak hmang bawk mah se Barca player-te zinga hlawh hnem ber pawl a ni a, sum lama inhrek ngai reng Catalan team hian an kawl zui ngam ta lo a ni ber.
Barcelona hian transfer deadline ral hma ngeiin an striker Vitor Roque pawh hralh an tum tih hriat a ni a; tunhnai khan an captain Sergi Roberto chhuah thu puangin, full-back Julian Araujo pawh Bournemouth lamah an kaltir bawk.