A tumhnihna’n Norris chak leh

McLaren driver Lando Norris chuan an ram tlankawnga chak chho char char Max Verstappen-a home record kal lai tihtawpsakin Pathianni Dutch Grand Prix-ah hnehna a chang a, season kal lai leh a Formula One career-a a vawihnih chakna niin, championship standing lamah Red Bull triple world champion hi la uma pha lo mah se beiseina a nei nung thar.
Dutch driver ropui Verstappen hian an tlanchhuah hnu lawkah pole position atanga bul tan Norris lehpelin hma hruai zui nghal mah se lap 72 tlan tura lap 18-naah Red Bull driver hian a hmahruaina a hloh a, a home race-ah second 22.896-in pakhatna ni ta British tlangval a pha lo.
Kum 2021-a Zandvoort tlankawnga Formula One intlansiak a kir leh hnua an ram tlankawnga hnehna a chan zawh loh tum khatna a nih rualin season kal lai intlansiak hnuhnung vawinga zetah pakhatna dinhmun a luah pha ta lo a, a tir lama a chak tluang pur pur boruak kha Max Verstappen hian a pha lo chho ta zel rih a ni.
Pathianni Zandvoort race-ah khan Ferrari car khalhtu Charles Leclerc chu pathumna niin lawmman semna dawhsan hniam ber a luah.
Norris tan tun kha a career-a pole position vawili a channa niin, Dutch tuifinriat kam lawngchawlh hmunah home supporter rual (Orange Army of fans) tlim sen hmur mah se a zam phah lo a, tun season-a intlansiak tum 24 zet awm tur (record thara) a vawi 15-naah hnehna changin driver standing-a a phak loh awmchhun Verstappen nena an inkar chu point 70-ah a pawtzim a, constructors’ championship lama McLaren leh hmahruaitu Red Bull inthlauhna pawh point 31 lekah a tlathla ta bawk.
Kumin May thla maia Miami khawpuia a grand prix hnehna hmasaber lo lawm ve tawh Norris chuan, “A mak ka ti kher mai. Duhthusam race ni lo mah se a va tuihnai si em.
“Kan car hi awihawm loh khawpa chak a ni. Na taka nawrin Max ka tlanpel thei a, intlansiak hautak zet ni mah se a phurawm kher mai,” a ti.
Florida tlankawnga an driver Norris-a’n hnehna a chan hnu khan McLaren chuan a vawikhatna atan an car an thuamchak (upgrade) a, hnehna chang zui nghal zawtin, intlansiak vawikua la awmah Briton hian driver standing-a Verstappen-a kal fawr lutuk tur a dangchep chho zel thei dawn em kan thlir ang.
Constructors’ title inchuhna lamah pawh McLaren tuihalna hi a nasa tawh hle a, kum 26 chhunga a vawikhatna atan Red Bull lehpela team title beisei thei turin an chung chiaha hmahruaitu team an hnaih ve zel.