Buhin sawi hlawh lo

Budget session kal mekah nimin khan zawhna leh chhanna hunah agriculture lam zawhna a lut thahnem ang reng viau na a, kan rin pui ber Buh-in sawi a hlawh lo hle.
Kan hriat angin Mizote chaw atana kan rin pui ber buhfai chu state pawn atangin kan chaw lut a, thla tin cheng vaibelchhe 33 (nuai 3300) vel kan seng thin.
Mizoramin buh a thar chhuah ve chu kum khatah thla hnih vel tla awrh a nih thu sawi a ni thin a; chu pawh chu Mizoramin thla tina buhfai kan chawk luh thin su hektu atan kan la hmang chiah lo lehnghal a. Hei hi, Buh thar chhuaktuten vaibuh lakna ration card an hman thulh phah chuan loh dan atang hian a lang chiang mai awm e. Mizoram chhunga buh tharchhuah chhun pawh sawrkarin lei tur a la hmu zo lo tih a ni leh a, Mizoram chhunga buh thar chhuah ve hian vai buh leina senso hi a su hek pha lo tihna a ni.
Kan ram mipui 60% vel hi agriculture lama eizawng an ni a. Tunah hi chuan ‘shifting cultivation’ hi a tlahniam hret hret a, sum chang thlai chin lamah an inlet chho mek a. Sum chang thlai chingtute pawhin hun bik nei thlai an la chin tam ber avangin off season-ah chuan thenawm state atanga thlai leh thei chawk luh a tam zawk zel bawk. A engah mah hian mahni tharchhuaha innghah theihna tham hi kan la nei pha lo.
Kan GSDP han en ila, agriculture leh a kaihhnawih atanga kan thawhchhuah chu 17% vel chauh a ni a, a bak 83% vel chu sawrkar hnathawk bakah sumdawngte an ni leh mai a. Chumi awmzia chu mipui tam zawk fe thawh chhuah aiin mi tlemte thawh chhuah chu a let li velin a tam zawk tihna a ni. GSDP-ah hian kuthnathawktute contribution a hniam viau chuan, kuthnathawktute hamthatna a la hniam hle tihna a ni nghal awm e.
Kan rin pui ber buhfai thar chhuah tam theihna leilet atana siam theih ram awl zau em em mai kan nei a, chumi puah puitlin theihna lam hawi han khel deuh laih laih thawm hi House-ah hian a awm mang ngai lo. Kan rin pui ber Buh ni si hi, a thar tam theihna lam hian ngaih pawimawh a la hlawh zo tawk lo tihna a ni ber awm e.
PMJVK sum zozaite kha leilet siam nan hman ni ta zawk se, Zoram mipui zawng zawng tana tangkai zawk tur a ni si a… tiin duhthu lo samtu an awm a nih pawhin a mawh lo ang.