A zawnin ni 20 ruah sur tawh

Ruah a tam a ni mai lo a, a sur rei tawh. Tunlaiin ruah a sur ni tin a, tun hnai ni 20 chhung Mizoramah ruah a la sur ziah.
State Meteorological Centre-a an chhinchhiah danin, August ni 7 atang khan ni 28 thlengin Mizoramah ni tin ruah a la sur.
Ni 20 chhung ni tin ruah a sur a ni mai lo a, a tam thei fu bawk. August ni 9-ah khan mm 0.2 a tla a, ni 13-ah mm 0.6, ni dangah chuan tih tham fe a tla zel.
August ni 28-ah khan mm 64.6 a tla a, ni 20-ah mm 63.8, ni 21-ah mm 45.8 a tla a, heng hi a tam zual nite a ni.
May ni 28-a remal cyclone ruah ken kha mm 205 a ni a, kha kha ni khata a sur tam ber ni a ni. A hma ni May ni 27-ah mm 80 a tla bawk. July ni 1-ah mm 84.2 a tla a, July ni 2-ah mm 79, June ni 22-ah mm 68.5 a tla. Heng hi kumina ruah tam ni a ni.
State Meteorological Centre lam chuan ni khata ruah tla zat mm 30 a tlin hian ruah a tam tia sawi tham a nih thu an sawi a, nilenga ruah a sur hian mm 30 te a lo ni fo an ti. Ni khata mm 40 a tlak phei chuan ruah hi tam tham tak a ni. Tun hnai ni 20 chhunga ruah surah hian mm 30 a tlin ni hi ni ruk a awm.
State Meteorological Centre enkawltute chuan ruah a tam bakah a sur zawn rei tawh tih an sawi a, a sur rei bakah hian baw hawk hawk khawpa tam a sur chang a awm fo bawk tiin tun hnaia ruah tui tlak dan hi an sawi.
August thlaah hian ni 5 leh ni 6-ah khan ruah tui a tla lo a, ni dang zawngah chuan ruah tui hi tlem tal a la tla ziah.
August thlaah chauh ni lovin thla dangah pawh kumin hian ruah a tam a, ruah a tlak tam thin bakah ruah hi a sur zing. January atang khan ruah sur loh thla a la awm lo.
Ruah a sur rei tawh bawk a, Mizoramah kawng hrang hrangin ruah hian nghawng a nei mek.