Mamata-i’n Capital Punishment kalpui duh

West Bengal Chief Minister Mamata Banerjee chuan karlehah State Assembly koh a ni ang a, chutah chuan pawngsualtute thi tura an chungthu reltheihna tur capital punishsment Bill passed a ni ang tiin a sawi.
Banerjee chuan Bill chu Governor C.V. Ananda Bose hnenah thawn a ni ang a ti a, mahse, Governor chuan a lo pawm duh a rin loh thu a sawi bawk.
Hetih lai hian Kolkata a R.G. Kar Hospital a trainee doctor pawngsuala tihhlum a nih avanga lungawilohna chu kalpui chhunzawm zel a la ni thung a.
“Karlehah, Assembly session kovin ni 10 chhungin pawngsualtute capital punishment pekna tur Bill kan pass ang a. Bill chu Governor hnenah kan thawn ang a, a pawm duh lo a nih chuan Raj Bhavan pawnah lungawilohna kan lantir ang. Bill chu pass ngei tur a ni ang a, a pumpelh thei hauh lovang” tiin West Bengal Chief Minister Mamata Banerjee chuan a sawi.
Mamata chuan Augus 27. 2024 a lungawilohna lantiru tena State Secretariat luhchhuah tuma lungawilohna lantira an kawngzawh an dan theih avangin State police te a fak bawk a.
“Nimin lawka police te hnathawhah khan ka fak duh a ni. Thisen chhuah khawpin chet an la a, BJP phiarrukna an titlawlh a ni” tiin a sawi bawk a.
“Uttar Pradesh, Madhya Pradesh leh Assam a thil thleng avangin Prime Minister bang turin an duh lo. Assam ah phei chuan accused chu intawhchilhnaah a thi an ti a nia” tiin a sawi.
Banerjee chuan pawngsualtute chu ni sarih chhunga capital punishment pek an duh tia sawiin pawngsual case chu fast track court in a ngaihtuah zel ang a ti bawk.
“Governor-in Bill a pawm duh dawn lo tih ka hria a. Bill pawm a nih theih nan kan hmeichhia ten lungawilohna an lantir ang” tiin a sawi bawk.

Ni 16 hnuah khawiah nge justice?
West Bengal Chief Minister Mamata Banerjee chuan doctor pawngsual case chungchanga CBI investigation ah zawhna neiin ‘khawiah nge justice chu?’ tiin a sawi.
Trinamool Congress students’ wing foundation day hmannaa thusawina a neihah Chief Minister chuan doctor thita nu leh pa te chu an fanu thih hnu ni hnihnaah a hmuh thu a sawi a.
“Ni nga chhung hun min pe turin ka ngen a, mahse, case chu CBI te kutah dah a ni a. Justice an duh lo a ni, an tikhawmuang a. Ni 16 lai a liam ta a, khawiah nge justice chu? tiin zawhna a siam zui a.
BJP tena darkar 12 chhung awh bandh huaihawt chungchangah, “BJP ten bandh huaihawt an tumna chu mithi ruang an duh vang a ni. Keini chuan justice duh thungin thiltisualtu chu khaihlum kan duh a ni. BJP te chuan victim tana justice chu pumpelh an tum thung a. Tunah Bengal tihming chhiain BJP te hian zah an hre lo va, phiarrukna bak an ngaihtuah lo” tiin a sawi bawk.