Kareena-i’n a ‘Pregnancy Bible’ avanga legal notice a dawn a chhang

Bollywood actress hriathlawh berte zinga mi Kareena Kapoor Khan chuan a lehkhabu ziah ‘Kareena Kapoor Khan’s Pregnancy Bible: The Ultimate Manual for Moms-To-Be’ tihah a lehkhabu hminga ‘Bible’ tih a hman tel avangin Madhya Pradesh High Court atangin legal notice a dawng a, he lehkhabu hi August ni 9, 2021-a tlangzarh tawh kha niin, legal notice hi May 2024 khan a dawng.
He lehkhabu hming chungchangah hian advocate Christopher Anthony chuan court-ah thu thlenin, he lehkhabu hralh hi tihtawp a nih theih nan hma a la a. Anthony chuan a lehkhabu hminga ‘Bible’ tih a telh chu Kristian-te zah lohna a ni tiin, Bible chu Kristian sakhuaa lehkhabu thianghlim a nih thu a tarlang.
Kareena ukil Divya Krishna Billaiya leh Nikhil Bhatt chuan he legal notice hi chhang letin, eng sakhua betute mah tihnat an tum loh thu an tarlang a. Kareena phei chuan a lehkhabu chu a fa pathumna ang hiala a ngaih thu sawiin, nu, naupai te tana inkaihhruaina tangkai tak tak a awm thu an tarlang ve thung.
Madhya Pradesh High Court chuan hemi chungchang hi September ni 10, 2024-ah hearing neih turin a ti a, court chuan notice hi a lehkhabu hralhchhuaktu leh publisher bakah a ziaktu Kareena te hnena a pe theuh a ni.
Anthony hisocial activist, Jabalpur a khawsa a ni a, ani hian he lehkhabu hi a chhuah hlim atangin hralh chhuah khap tir tumin court-ah a lo zualko tawh a, mahse, court-in a thuthlen chu hnawlin, Anthony hian Kareena lehkhabu hminga ‘Bible’ tih telh a ni chu Kristian sakhua zah lohna a nih dan finfiahna tha tawk a nei lo an ti a. Chumi hnuah Anthony hian Additional Sessions Court-ah a appeal leh a, chutah pawh chuan an lo hnawl sak leh ta a ni.