Project monitoring

Mizoram State Project Monitoring Committee Team ‘B’ leh ‘C’ chuan Nilaini khan New Market-a dawr leh thlai thar zawrhna hmunpui tur ‘Aizawl City Centre’ leh ‘Aizawl City Centre Annexe’ sak mek an enfiah a. Tun tum hi an vawi hnih tlawhna a ni a. Hna kal lai chak zawk leh tha zawka kalpui dan tur Nodal Department leh Contractor te an sawipui a. Harsatna an tawhte sut kian dan tur an sawiho, tih chu sawrkar thuchhuaha kan hmuh dan a ni.
Aizawl City Centre hi cheng vaibelchhe 42.82 (nuai 4282) senna tur, January, 2023-a sak tan niin November ni 30, 2025-a zawh tura ruahman a ni a, tunah 38% vel zawh tawh a ni.
Aizawl City Centre Annexe hi NEDP sum cheng vaibelchhe 36.41 (nuai 3641) senna tur, June, 2020-a sak tan tawh kha a ni a, 75% vel zawh tawh a ni.
Aizawl City Centre Annexe hi bultanna a rei tawh ngaihtuahin sak chhung a rei ta ngat ngat hle a, kum 4 pumhlum hna thawh tawh a ni chungin 75% vel chauh zawh fel a la ni a, an thawh tawh dan chhutin la zawh fel loh 25% vel thawk zo tur chuan kum khat chuang a la ngai dawn tihna tluk a ni. A aia project lian zawk Aizawl City Centre hi thla 34 (Kum 2 leh thla 10) chhunga zawhfel tura tih a ni a, kum 1 leh thla 7 hun an hmang tawh a, tunah hian 38% thawh tawh a ni a, hei pawh hi tuna an thawh dan chhut hi chuan, a hunah an zo hman dawn lo tihna a ni.
Heng project lian tak tak pahnihte hi sawrkar hmasa huna bul tan a ni a, sawrkar thar hnuaia Project Monitoring Committee-in a vil hun chhung hi a la rei lo viau na a, khawpui hmasawnna hnathawh pawimawh tak, sumdawng tam tak leh mipui nghawng thil a nih avangin chak taka nawr kal a pawimawh tih a lang reng a ni.
Hetih rual hian, tuna khawpui chhung kawng kam vel, street vending zone pawh ni lova inzuar tam takte pawh hi, he bazar hmunpuia thu tur hi an ni furin a rinawm a, he Centre hi sak zawh a nih hma hi chuan, ngaihhnathiamna sang tak nena enkawl an tulin a rinawm.