Mizorama ITI tih changtlunna scheme kalpui dan tur sawipui

New Delhi-a sawrkar laipui dawra kal minister Lalnghinglova Hmar chuan Ningani khan Ministry of Skill Development and Entrepreneurship (MSDE) secretary Atul Kumar Tiwari a hmu a, Mizorama skill development hmasawnna tur an sawidun.
Mizoram LESDE minister hian sawrkar laipuiin Industrial Training Institute tihhmasawnna tur scheme liantham a ruahmanah Mizoram pawh he scheme mamawh ber zing ami a ni, tiin, ITI upgradation scheme-a Mizoram sawrkarin rawtna a neih a thlen. Mizoram chu industry liantham awm lohna a nih avangin kawng thenkhatah ngaihnathiam a ngai tih a sawi.
Tunah Mizoramah ITI pathum awmin, Government ITI Aizawl chu India rama ITI titha zingah a tel a, ITI sak mek pali a awm tih a sawi bawk.
MSDE secretary chuan minister rawtna thlen chu thil pawimawh a ni hlawm tih a sawi a. Mizoram sawrkarin harsatna a neihte nen chiang zawkin ziaka thlen leh nise tiin an ti a. LESDE officer-te nen thutkhawm thuai a duh tih a lo sawi a ni.
MSDE hnuaia scheme pakhat, Pradhan Mantri Kaushal Vikas Yojana (PMKVY) chungchanga thawktuten harsatna an tawh thin chu Lalnghinglova Hmar hian a sawi a. Secretary hian scheme chungchanga mawhphurtute koin a chinfel dan tur ruahman nghal a ni.
MSDE chuan PMKVY 4.0 hnuaiah Mizoram tan special project siamin, kumin March 1 khan cheng vaibelchhe 31.06 a rawn ruahman a. Mizoram state special project hnuaiah hian thalai 10000 chuang skill training pek tum niin, tunah hian registration kalpui mek a ni a, training centre thenkhat chuan training an kalpui tan tawh a ni.