Inter District Wrestling thununtu Kolasib

Inter District Wrestling thununtu Kolasib
Greco-Roman style-ah Kolasib an chetha a, Ningani zan hun an hman zawh rualin Inter District Wrestling Championship-ah Aizawl leh Serchhip lehpelin an sang ber.
Mizo palian inchai champion lai cho thei tur he thu buatsaih lai hian a la chiang lo deuh a; Lalremtluanga’n Laldinthara chungnung takin a hneh a, nizan hmawrbawknaah Lalrinchhana Sailo nen title fight-a tel tur zawk nih an inchuh a, tunge dingchang ta zawk tarlan hman a ni ta lo.
LPS Arena, Falkland-ah Mizoram district 11 zinga pasarih an inel a, ni hmasa berah sub junior atangin Kolasib-in gold medal panga lain hma an hruai zet a, mahse, Ninganiah pakhatna nihna an neih belh lo avangin pathumnaah an tlahniam.
Ni hnihnaah senior huanga greco-roman style inelna chi thum zawh fel a ni a, Kolsib-in gold pahnih an lak mai bakah kg 58-ah dawhsan luah fai vekin, John Lalremmawia a chak ber a, Lalhumhima’n silver lain David Lalruatpuia’n bronze a dawng thung.
Kg 40 final-ah Kolasib ve ve inchai bawkin Isak Lalmalsawma’n Jonathan Vanlalngaihsaka a hneh a; junior freestyle kg 58 final-ah Lalnuntluangi’n Lalduhzuali (Serchhip) hnehin gold medal a la bawk.
Kolasib-in gold paruk nen medal 13 dawng tawhin hma an hruai a; Aizawl tan junior freestyle kg 50-ah Esther Lalchhanchhuahi leh kg 70-ah Lalnunsanga an champion ve thung a, gold panga nen medal 24 la tawhin pahnihnaah an awm.
Serchhipin gold panga la ve tho mah se silver pahnih an kawl a, ni hnuhnung ber, nimin, Zirtawpni khan an chetha a nih chuan a pumpuia sang ber nih theihna hun tha an la nei a, chu dinhmun chu an luah ta chiah em hriat hman a ni lo.
Senior greco-roman style kg 65-ah Lalchhanhima a champion a, Saitualin gold medal an lak hmasak ber leh awm chhun a ni rih. Senior freestyle kg 50-ah Elizabeth Kawngkharmawii’n Lunglei tan gold medal hmasa ber a thawkchhuak bawk.
Ningani zanah Mizo inchai title chuh tur zawnna semi-final zawh a ni ve thung a; palian pathum tel zingah Zobawk, Lunglei inchai chak Remtluanga’n harsa lo takin Nilaini zana Rinchhana’n a bawhbeh tawh Zokhawthar tlangval Dinthara a hneh.
Thawh khatnaah Remtluanga’n a bawhbet a, a hnuah 14-0-a sang zawk a nih laiin dar hliam vangin thawh hnihna khel tluan loin Dinthara a inhnukdawk a ni.
Palaihawlah Serchhip pa chak RD Lalthansanga’n thawh thum an inbeih chhungin 32-0-in John Zonunsanga (Ailawng) a hneh a, final-ah Saitual tlangval Ngursangzuala nen an intawng zui.
Ngura hian 4-0-in Vanlallawma (Muallungthu) a hneh ve thung a; thawh thum an inbeih chhungin a duh angin bawhbet thei lo mah se a nawr chhuah thin bakah danglamna thleng thei khawpin point a thawkchhuak.
Inter district inelnaa Saitual gold medal neihchhun latu Lalchhanhima’n Pate title lakkir a tumna a puitlin zo lo teuh hle a, semi-final lamah inhnial theih takin a chak.
Republic Veng tlangval Hmangaihzuala nen point khat mah hmu lo ve vein thawh thum an hmang zo. Inbanphawi hmangin a chak an zawng a, a vawikhatnaah tuan tha leh an inchai chhunga lehlam thunun hnem zawk Hmangaiha a chak emaw tih hnuah referee leh judge thutlukna a inan loh avangin an titha leh.
A tum hnihnaah pawh chak zawk a chiang lo viau na a, Saitual pa chak Chhanhima lamah referee-in ban a phar ta a ni.
Semi-final lehlamah 2011-2014 chhunga champion Lalawmpuia’n Johny Lalawmpuia (Saitual) a hneh hram a; a bet zawkah tang hnem mah se point a hloh lo a, rin bial pawnah vawikhat a keuh chhuah chhawrin, 1-0-in Bulfekzawl chhuanvawr a tlang.
Nimin chawhnu dar 1 khan inelna chhunzawmin Inter District Championship bik zawh fel a ni a; nizanah Mizo inchai palian, palaihawl, pate, nulian leh nute champion lai cho tur zawnna final an khel a, result erawh tarlan hman a ni ta lo.