Ruah la sur zel turah ngai Fimkhur turin mipui chah

Ruahtui la tlak chhunzawm zel tura ngaih a nih avang leh lei a hnip tawh avangin sawrkar chuan fimkhur turin mipui a chah.
Disaster Management & Rehabilitation secretary K Lalrinzuali’n thuchah a siam danin, kuminah fur ruahtui a tlak tam avangin Mizoram hmun hrang hrangah chhiatna thleng a tam a. Leimin avanga nunna hial chân leh in leh lo chan mi engemawzat an awm bakah leimin vangin inkalpawhna lamah harsatna tam tak a thleng a. Kumin ruahsur nasa in kawng hrang hrangin nunphung a ti khaihlak a, chhiatna thleng hi sawrkar chuan pawi a tiin a tuartute a tawrhpui a, mipui harsatna sukiang turin theihtawpin hma a la reng tih a sawi a ni.
Khawchin thlirtu, India Meteorological Department-in ruah la sur chhunzawm tura a tarlan laiin, leilung a hnip tawh a, hmun hrang hrangah chhiatna thleng thut thei a nih vangin fimkhur turin mipui a ngen tih a sawi a. Mahni in leh a vela tui kal dan ennawnin, leimin thei hlauhawm leh chhiatna liantham thlen thei a awm chuan thuneitute hnenah a rang lama hriattir turin mipui a hriattir tih a sawi.
Ruahsur nasa avanga harsatna awm theiah sawrkar department hrang hrang mahni mawhphurhna theuh hlena theihtawp chhuah turin a ngen tih a sawi bawk.