Mamit district-a chhiatna thleng chinfel dan tur sawi

Tunhnaia fur ruahtui nasa tak avanga Mamit district-a chhiatna hrang hrang thlir hoin District Disaster Management Committee chu chairman, bawrhsap Jacob Lalawmpuia hoin Thawhtanni khan an thukhawm.
Chairman chuan tunhnaiah ruah nasa tak sur avangin district ang zawng pawhin a tuar nasa ber an nia a lan thu a sawi a. Eng angin nge harsatna kan chinfel anga, hmalam hun atan engtinnge kan inbuatsaih ang tih ngaihtuahho a tul tih a sawi a ni.
Report-a tarlan danin, PWD Highway Mamit Division huamchhungah leiminin kawng a hnawh hmun 24 awmah 21 chu thenfai/tih tlang a ni tawh a, ruah a sur nasat chuan min leh mai thei a awm nual. Tuidai bul min tlang hun tur sawi mai theih ala ni loa, thuneitute hnenah a siamthatna tur thlen mek a ni. Mausen kawng hlui lam chu zawh theihin awm tawh mah se, kawng enkawl lohna rei tawh a nih avangin lirthei lian chi tana tlan harsa lai a awm a; he kawng thawmthatna tur pawh thuneitute hnenah thlen mek a ni.
Khawchhung kawng min neuh neuh thenfai nual a ni tawh a. Mamit atanga Phaizau panna kawng chu tunkar chhunga sial tlang beisei a ni a; Mamit to Bairabi panna kawng pawh leimin vangin kaltlang theih a la ni lo.
PHE Department report danin, Phaizau atanga Mamit tui lakna kawng chu leimin vangin a chhe vek a, kar hnih chhung vel tui lakluh theih a ni dawn lo. Power & Electricity Department Mamit Division huamchinah leimin hian electric ban tlu leh awn a siam nasa a, Bairabi to W.Phaileng via Mamit eng lakluhna tower pakhat a bul leimin avangin dinhmun hlauhawmah awm mekin, kawng tlang loh vanga la chian loh a awm bawk. Ruahsur vanga chhiatna tawh siamtha leh tur hian Rs.7,64,000 sen a ngai dawn niin an inchhut.
Buhfai dinhmunah kawng kal harsa zual kudam 8-ah October leh November thleng stock a awm a. Kudam 4 – Mamit, W. Phaileng, Phuldungsei leh Pukzing erawh an thla mamawh dan azira pek thin an ni. Oil lamah thlaphanna tur a awm lo tih sawi a ni a, LPG trip kal mek a awm tih sawi a ni bawk.
Thutkhawmah hian W.Phaileng BDO, Reiek BDO leh Kawrtethawveng BDO atangin an huamchhunga chhiatna leh harsatna an tawh an report a. Mamita village council 6 atangin an vengchhung dinhmun an report a ni.