Oilpalm phurhna kawng chhiat avangin zangnadawmna ngen

Mamit district khaw hrang hranga oilpalm ching association hruaitute chu Ningani khan Darlakah inhmukhawmin, oilpalm rah an sengkhawm phurchhuahna kawng a chhiat avanga an sum hloh phahnaah sawrkarin zangnadawmna pe turin an ngen tih an sawi.
Kumin August chhunga oilpalm rah an lawhsa, phurchhuahna kawng a pin avanga oilpalm rah an hralh thei lo chu oilpalm chingtute tan channa nasa tak a ni tih an sawi a. Oilpalm hmin tam tak a kunga la awm mek a hmin nasat avanga tla ral mai mai chu an ui tih sawiin, oilpalm rah an hralh theih loh avanga chhungkaw tam tak a nghawng dan an sawi bawk.
Mamit District Oilpalm Ching Association hruaitu kalkhawmte hian an harsatnate Mizoram sawrkara thlen nise, an ti a. Oilpalm rah lawh sa a phurchhuahna kawng a pin avanga sum leh pai tam tak an chan avangin, sawrkarin kuthnathawktute tawrhna hriatpuiin zangnadawmna min ngaihtuah sak turin an ngen.
Mamit district-a oilpalm rah phurhna kawng, National Highway 108 ping mek chu a rang thei ang berin sawrkarin sial kuak sak turin an ngen a. bawk.
Thudawn danin, Mamit district-a oilpalm chingtu hi chhungkaw 444 an ni a, chhungkaw 259-in a rah an seng mek. Oilpalm rah seng mekte hian kum khatah cheng nuai 563 vel oilpalm rah hralna atangin an hmu thin a ni.
Oilpalm chingtute hian kumin July chhung khan an oilpalm rah hralhna atangin Rs. 70,10,479 an tel a. August khan July thlaa an thar ang tho hi thar an inbeisei laiin, kawng chhiat vangin an oilpalm rah hi an hralh thei ta lo a ni.
Mamit district-a oilpalm chingtute oilpalm rah thar hi Godrej Agrovet Pvt. Ltd.-in leisakin, Kolasib district Bukvanneiah an phur thleng thin a ni.