Turkiye in BRICS member nih duh

NATO member Turkiye chuan developing economies ram intelkhawm BRICS membership nih duhin dilna a thehlut tiin senior Kremlin official chuan a sawi a. Russia leh China te chuan Khawthlang ram tena global influence an neih te tihdal a nih theih nan theihtawp chhuahin hma an la mek bawk.
Yuri Ushakov, President Vladimir Putin’s foreign affairs aide chuan Turkiye chuan BRICS a tel duhin ‘full membership’ application an thehlut tia sawiin ngaihtuah a ni ang a ti bawk.
Turkish President Recep Tayyip Erdogan chuan BRICS alliance member nih a duh thu tum tam tak a sawi tawh tiin Omer Celik, Erdogan kaihhruai ruling party thupuangtu chuan a sawi bawk.
BRICS hi kum 2006 khan Brazil, Russia, India leh China tena an din niin kum 2010 khan South Africa in a zawm ve bawk a. Tun hnai lawkah nasa taka tihlen niin Iran, Egypt, Ethiopia leh United Arab Emirates te pawh an tel tawh a. Saudi Arabia chuan zawm ve a tum thu sawiin hei bakah hian Azerbaijan leh Malaysia te chuan zawm tumin dilna an thehlut tawh bawk.
BRICS in a tum ber chu major emerging economies te inthuruala western kaihhruai global order hmachhawn a ni a. BRICS dintu ram te chuan world order fair zawk leh international institution United Nations, International Monetary Fund leh World Bank te reform a ni bawk.
Turkiye a kum sawm hnih chuang thuneihna chang tawh Erdogan chuan global influence zau zawk a neih thieh nan Turkiye tan independent foreign policy nasa zawka kalpui duh a ni a. Turkiye chu European Union member nih a tumna lamah hmasawnna awm chak lo chuan a tihnual bawk.
Erdogan chuan tun hnai lawkah pawh Turkiye chuan khawchhak leh khawthlang te nen inzawmna tha neih ve ve a ngai a ti bawk a. Turkiye hi Europe leh Asia inzawmna laia awm niin kum 1952 khan NATO military alliance a zawm a. Kum 2005 atang khan European Union zawm tumin hma a la tawh a, mahse, Erdogan sorkar hnuaia democracy namnulna awma ngaihna avang leh Cyprus nena inbakkaihna an neih avangin hmasawnna a awm tak tak thei lo thung.
BRICS te chuan thla thara Russia a meeting an neih hunah Turkiye dilna chu an ngaihtuah dawna ngaih a ni a. A hmain Putin chuan Turkiye in bloc zawm a tumna chu lawmawm tiin Moscow chuan a thlawp tlat dawn tiin a lo sawi tawh bawk.
Thawhtanni khan Putin thupuangtu Dmitry Peskov pawhin Turkiye chuan BRICS zawm a tum tiin a lo sawi tawh bawk.