Suarez kan thlahliam ve tawh dawn…

Suarez kan thlahliam ve tawh dawn…
Uruguay legend Luis Suarez chuan tunkar Thawhlehni khan hnukulh teuh chungin international football a chawlhsan ve tawh tur thu a puang a, Inrinni World Cup qualifier match-a Paraguay an mikhual tum hian ram tana a match hnuhnungber a khel dawn a, Montevideo khawpuia an khelmual ropui Estadio Centenario match hi amah thlahna (farewell match) a ni nghal ang.
Kum 37 mi ni ve ta Suarez hian February 2007 khan Colombia hmachhawnin Uruguay tan a khel tan a, Inrinnia Paraguay a hmachhawn hma chiah thlengin ram tan tan match 142-ah goal 69 a thun tling tawh a, Uruguay tana goal khung hnem ber a ni mek.
Liverpool leh Barcelona forward hlui chuan media hmaah a chawlh tur thu hi puangin, “Chawlh chungchang hi nguntaka ngaihtuahin ka zirchiang a, tun hi a hun dik tak niin ka hria.
“National team tana ka game hnuhnungber hi hahdam taka khelh ka duh dawn a, kum 2007-a ram tana ka bultanna game ang mai kha ni dawnin ka hria.
“Khatih laia rawlthar kum 19 mi lek kha tunah chuan veteran player niin, player upa zawk a lo ni ve ta reng mai a, chuti anga sawi chu in duhdan pawh a ni ang. National team behchhanin awihawm loh zawk history kan lo ziak ve tawh a, he hringnun hi team tan kan hlan ve tur a ni reng a ni,” a ti.
Suarez hian Uruguay tan major international tournament vawikua ngawt a khel tling a, chu’ng zinga a hmingthanpui pakhat chu kum 2010 World Cup quarter-final match extra time tawp hma minute khat chiah awm tawha Ghana chakna goal tur a kut hmanga a namchhuah kha niin, penalty chawiin hnawhchhuah ni bawk mah se a handball avang khan penalty shootout kaltlangin semi-final an luh phah ta a nih kha!
Suarez-a penalty chawi chhuih tura lo penchhuak Sunderland striker hlui Asamoah Gyan khan thun se African ram zinga World Cup semi-final thleng hmasaber ni mai tur an nih laiin a khung lo a, kum 40 chhunga a vawikhatna atan world champion hmasaber Uruguay-in World Cup last four an lut ta zawk a ni.
Kum 2011 khan Suarez hian Argentina ramah Uruguay chu Copa America trophy a lakpui a, goal li khungin tournament chhunga goal khung hnem ber dawttu a ni nghe nghe.
Kum 2014 World Cup-ah khan goal hnih thunin group stage-ah England an hneh a, mahse, Uruguay final group game-ah a ha za lutukin Italy defender Giorgio Chiellini awma a seh avangin thlali chhung atan inkhel thei lo tura phuarbeh a tawk a, group stage lamah a inlan zui thei lo.
Suarez hi international match kua khel thei lo tura hrem a nih zui tak avangin 2015 Copa America kha a khel ta lo a, chuti ni ki se ram tan international tournament vawi 10 khel tling tur a ni.
Tunhnaia a chawlh tur thu a puanna press conference-ah Suarez hian national team-in hun harsa leh khirhkhan pui pui an lo paltlang tawh thu sawi chungin mimala a harsatna tawh chu a zualkai niin a sawi a, a bik takin kum 2014-a a hun tawn kha a harsa zual tih sawiin, inchhirna erawh a neih loh thu a tarlang tel.
Suarez hian kum 2018 leh 2022 World Cup bakah Copa America vawinga a khel tling a, kum 17 chhung teh meuh ram tan khelmual chhunga a theihna a lo hman thin chu Inrinni zan atangin a chawlhsan ve tawh dawn a ni.
Club football erawh a la khelh chhunzawm zel rih dawn a, tunah hian America ramah Inter Miami tan Major League Soccer a khel mek a; ram tana 2011 Copa America trophy a chawi tawh bakah hian club lamah pawh hlawhtlinna sang ber ber a lo hlawhchhuak tawh a, Europe-a a khawsak chhung khan top-flight title paruk, Champions League trophy pakhat leh Copa del Rey title pali a la tling a; club lian kan tarlan tawhte bakah hian Atletico Madrid, Groningen leh Ajax thuam a inbel tawh bawk.
Suarez hi Uruguay rama mihring tam ber dawttu khawpui Salto-ah a piang a; a pian atanga ni 21 a liam leh rualin he khawpuiah vek hian Manchester United star Edinson Cavani a piang ve chiah bawk.
Chhungkaw lianpui, harsa ve tak an nih avangin a nuSandra chuan a fapa Suarez-a inkhelhna tur football boot leisak pawh a harsat ve thin.
Kum sarih mi lek a nih laiin Uruguay khawpuiMontevideo lamah a nu leh pa chuan Suarez leh a unau mipa thah parukte chu an pempui a, tah chuan Urreta-ah youth football a khel zet a, kum 14 a nihin Nacional lamah a insawn ta a ni.
Youth leval-a a thiam tawh em avangin May 2005 khan Copa Libertadores-ah Junior of Colombia an hmachhawn tumin first-team debut a nghakchhuak ta a, mahse, a la tluang purh chuang lo a, senior team tana goal khung turin thla li zet a nghah a ngai a, hetih chhung hian an fans ngeiin a
Goal a rawn khung pawp hnu chuan kum 2006-ah Dutch top-flight club Groningen-in kum 20 mi Suarez chu an senglut a, league match 29-a goal 10 a tihluh tlin avangin Uruguay squad-a koh pawh a ni ta hial a; he mi hnu hian Dutch club lian Ajax chuan pound maktaduai 6.75-in an lalut ta a ni.
A hnu lam chu history ropui hringtu a ni ta a, Amsterdam club tan match 159-ah goal 111 tilut tlingin, kum 2011 a herchhuah meuh chuan Liverpool-in pound maktaduai £22.7 zetin Anfield-ah an hruailut a, chu ta tangin Barcelona leh Atletico lamah a kal ta zel a ni.
Kum 13 mi lek a nih laia a bialnu ni tan Sofia nen inneiin chhungkaw duhawm tak an din mek.