Aizawl veng 11 zun-ek leh tui thli sawngbawlna siam dawn

Aizawl khawpui chhung zone-7 huamchhunga veng 11 zun-ek leh tui thli mumal taka sawngbawlna tur project ‘Small Bore Sewerage & Septage Treatment for Aizawl Zone -7’ kalpui tur Zirtawpni khan UD&PA minister K Sapdanga’n a khuh hawng.
PHE leh UD&PA department tangdun buatsaiha treartment plant din chu project pawimawh tak, hriselna khawih leh chona nasa tak kengtel a ni tih UD & PA minister hian a sawi a. Sawrkar hmalakna project lian leh pawimawh chu mipui zirtir leh hrilhhriat kawngah tun aia tan lak a pawimawh tih a sawi.
Project kalpuina tur Aizawl West huamchhunga chengte an vannei tih sawiin, nitin khawsak leh nunna atana tangkai, dam chen khawih thil a nih avangin a hlawhtlin theih nan thawhho thiam a ngai dawn tih a sawi. Zun leh ek thli a lo thianghlim a, thianghlim leh hrisela chhuah leh theihna tura tan lak chu ngaihpawimawha neih a tul tih a sawi a. Project kalpui tur chu tha tak, a nihna ang taka hun ruat chhunga zawh hman tum turin a chah.
PHE minister Prof. Lalnilawma chuan he project hi an department kaltlanga sewerage & septage project kalpui hmasak ber tur leh mipui vangtlang hriselna tura duan a ni, tiin, “Hei hi a huamchhung Aizawl tlak lam vengte thli bawlhhlawh sawngbawlna leh Aizawl tuilakna tihthianghlim, tui hrisel petu tur a ni,” a ti.
Hawnna inkhawm zawh hian he project-in a huam tur zone 7 huamchhung veng hrang hrang local council, YMA, MHIP, MUP leh khawtlang mipui inhrilhchian leh inrawnkhawm neih nghal a ni.
* Master Plan for Aizawl Vision -2030 siamah Aizawl khawpui chu zone 9-a then niin, zone-6 ah he project hi SIPMIU-in an kalpui tawh.
* Tunah hian zone-7 hnuaia local council 11 (Dawrpui, Chawnpui, Tuikual North, Tuikual South, Dinthar, Dawrpul Vengthar, Vaivakawn, Kanan, Khatla, Mission Veng, Zarkawt) ah kalpui tur niin, National Green Ttribunsl zirchiannaah Aizawl tuilakna, Tlawng lui pawhtu Tuikual lui leh a pawhtu luikawrte tih thianghlim a tul avangin hmalak lehna hmasa atan zone-7 hi thlan a ni.
* UD&PA hnuaia AMRUT 2.0 Scheme kaltlangin PHE-in water supply leh sanitation atan cheng vaibelchhe 145 vel a hmu a. Heng zinga cheng vaibelchhe 105.86 hi khaw 19-a tuilakna atana ruahman niin, thawh mek a ni. Cheng vbch. 39 chu sanitation atan ruahman a ni a, first installment cheng vbch. 29 dawn tawh a ni.
* Small Bore Sewerage & Septage Treatment for Aizawl Zone 7 project hi cheng vbh 38 vel senga thawh tur niin, kum 2 chhunga zawh tum a ni a, company-in a enkawl zui hna kum 3 chhung a thawk ang