Rodriguez-a club thar Vallecano

Real Madrid leh Everton playmaker hlui James Rodriguez kha La Liga club Rayo Vallecano chuan free agent-in an senglut.
Kumin nipui thawt tantirh laia Brazilian club Sao Paulo a chhuahsan hnu khan Colombian hian club vawn a nei lo hman ren rawn a, kum 33 mi laite a lo nih ve tawh bawk avangin club lianho inchuhrawn a ni ta chiah lo a, mahse, duhtu a la tawng ta tho a, a lo tlangnel tawh thinna Spanish top flight-ah a kirleh ta a ni.
He Colombian playmaker hian kumin July thla khan Colombia-in Copa America final an luhna kawngah assist vawiruk siamchhuakin, Argentina laka a teamtlawm tur chhan zo ta lo mah se player of the tournament atan thlan a ni.
A club thar Rayo Vallecano hi season liamta khan 17-na niin, tun season kal mekah vawikhat chakin draw vawikhat an nei tawh a, table-ah pariatna an luah mek.
Colombia tana match 106 khel tling Rodriguez hi 2014 World Cup-ah khan a chetha bawk a, Golden Boot hial dawngin, kha mi kum nipui lai vek khan Real Madrid meuhin an senglut ta hial reng a ni.
Kum hnih chhung atan loan-a Bayern Munich a zawm hma zawng khan Rodriguez hian Spanish champion tan khan game 125 akhel tling.
Spain ram atang chuan kum 2020 khan Everton-ah a insawn a, Toffees tan game 26 a khel tling awrh tihah an inremna anga thla 12 hun la nei chungin sum tamna Qatari club Al Rayyan lamah a chhuak a; Arab ramah pawh chuan awm rei ta chuang loin a kumlehah Greek club Olympiakos a zawm a, nikumah Brazil lamah kalin Sao Paulo a zawm a; Brazilian club nena an inthen hnuah Spanish kawtkai bawk a vak thleng leh ta a ni.